Connect with us

AVB

Final Division Uno a marca historia – Atletico Santa Fe ta campeon pa prome biaha ganando Unistars 4-2 – un resumen

E final di Division Uno 2021-2022 no a defrauda, mas bien e tabata un aire fresco di competicion sano cu fanaticonan excitante y positivo, e anochi di futbol aki tabata di berdad un di bon ambiente cu tremendo “vibe”.

Atletico Santa Fe vs Unistars – Foto: Nathan Richards

Dos ekipo cu nunca a yega di hisa e trofeo di campeon den e division aki, mehor dicho, ningun di e dos ekiponan aki hamas a yega di bai final den nan historia, pero tanbe simbolico di dos organisacion cu a pon’e como meta pa yega na algo mas grandi cu nan tabatin den pasado, pa hasi un cambio, pa bira mihor, pa logra y celebra.

SV Atletico Santa Fe – Foto: Nathan Richards

Santa Fe, un club di e bario di Meiveld y alrededor, incluyendo Rooi Afo y Pavia, cu realmente ta existi foi anjanan 60 caba, pero den e ambiente futbolero no a yega di gana casi nada, pero den e ultimo anjanan tabatin un iniciativa hopi serio pa “rebuild” un projecto ganador, hopi tambe basa riba inversion den nan ekiponan hubenil, awe e esfuersonan ey ta cuminsa duna fruta, man’e e dicho ta bisa y nunca ta faya; “waar d’er is een wil is een weg”.

SV Unistars – foto: Nathan Richards

Unistars, oriundo di e bario di Pos Chikito y becindario, man’e Sabana Basora cu nan veld band’i Rooi Lamoenchi, ta un projecto cu a cuminsa pa nan fundador Robert “Roy” Croes na 1988. E idea tabata pa duna e bario un ekipo cu por competi cu seriedad p’un bario cu di berdad tin hopi mester di participacion di e hobennan den algo positivo y constructivo. Roy Croes lastimamente a bai laga e mundo aki e anja aki, pero su vision a cuminsa duna fruta tambe.

E partido den cuminsamento tabata mas bien den man y control di Unistars den e prome parti di e prome tempo. Nan tabata e ekipo cu mas iniciativa ofensivo, ta man’e cos nan no tabatin nada di perde y a bai “all out” trempan, y t’asina nan a sigui hunga tambe pa gran parti di e wega apesar cu ni pia nan no tabatin mas pa ora a yega den e ultimo parti di e wega den e di dos tempo, un ekipo di berdad cu hopi curason.

Santa Fe a cuminsa e wega un poco mas conservativo, calcula mas bien, wardando pa wak con pa reacciona n’e iniciativa di Unistars, y ‘poco-poco’ nan a bin ta build un momentum, drentando den e wega cu enfoke riba e “long term”, claro, basa tambe riba nan condicion fisico bentahoso. E ekipo di Meiveld no a flakea ora nan a bai abou den inicio di e partido, tampoco ora cu nan a perde nan bentaha atrobe prome cu halftime.

Emile Roodson a anota e prome gol di wega – Unistars –  foto: Nathan Richards

E prome gol di e partido a cai na minuut 15 pa Unistars pa medio di Emile Roodson, Santa Fe 0 – Unistars 1. Un hugada cu a cuminsa cu Roodson mes foi p’atras den defensa, sprint bai den atake, combina cu Iezekiel Rojer cu ta debolb’e e bala na rand di area penal unda Roodson ta fusila e portero Nathan Franken p’e gol. Alegria pa nan tanto fanaticonan cu a yega stadion pa sostene nan foi e tribune sin dak basta yen.

Rick Englebrecht di Unistars y Anthony Maduro di Santa Fe – foto: Nathan Richards

Santa Fe a reacciona bon, nan no a cai den paniek realmente, nan a djies sigui hunga nan wega, pero a pusha mas rib’e e trot si. Nan prome gol pa empata e wega a yega na minuut 21 caba, gol di Ashton Charles, cu asistencia di Marlison Hooi cu a ataka y desequilibra e defensa di Unistars rib’e left flank pa hasi un p’ase perfecto pa Charles cu tabata den area penal, p’e gol di empate. Santa Fe 1 – Unistars 1.

Marlison Hooi – Atletico Santa Fe – King of the Match – foto: Nathan Richards

Na minuut 30, Santa Fe ta tuma bentaha pa prome biaha despues di e gol di Anthony Maduro despues di su mes un bon esfuerso na banda robes di e area penal, Santa Fe 2 – Unistars 1.

E bentaha di Santa Fe no a dura mucho ya cu na minuut 37 caba Unistars ta bolbe bringa bek y ta empata e partido pa medio di Iezekiel Rojer, e capitan di Unistars, un pas’e di Rick Engelbrecht foi di gran distancia, Santa Fe 2 – Unistars 2. Asina tambe halftime a bai aden.

Antonio Lopez – capitan di Atletico Santa Fe – foto: Nathan Richards

Den di dos tempo e partido a sigui cu Santa Fe ainda cu mas iniciativa, basta yegada, Unistars a wanta tur e tempestad nan aki desde prome cu halftime, apesar cu nan mes tambe a tira dilanti ora cu nan haya un oportunidad.

Despues di hopi insistencia, Santa Fe alfin a bora e net na minuut 59 pa medio di nan hungador Marlison Hooi, unda cu el a schaak dos defensor di Unistars y pon’e bala den net pa duna su ekipo bentaha un biaha mas. Santa Fe 3 – Unistars 2.

Di akinan en adelante tabata mas bien un “survival of the fittest”, Santa Fe semper cu mas posesion di bala, pero, un poco cauteloso pa no laga “ruimte” den nan linea defensivo pa no duna Unistars chens, ya cu nan sa probecha bon di e cosnan aki. E partido tabatin dos destino foi e punto aki; sea cu Unistars ta logra e gol di empate y forsa alargue kizas, of, Santa Fe ta logra e ‘gol di knockout’ pa finalmente dicidi e final aki y tambe e campeonato mes.

Atletico Santa Fe celebrando victoria – foto: Nathan Richards

Despues di hopi ‘toma y d’ame’ apesar cu Unistars tabata completemente “uitgeput”, mas compara cu Santa Fe, y den hopi ocasion Santa Fe tabata cerca di propina e golpi final, pero, e portero Emran Maduro a salba Unistars di bai abou, bon desempeño di portero Maduro den e wega aki, sin duda. Toch e dam a kibra na final, y di berdad te na final, na minuut 94, alfin, e knockout a yega, ora cu Santa Fe ta haya un penalty, unda cu Emanuel Faro ta anota pa practicamente sella e victoria pa e oncena di Meiveld.

Esey tambe tabata e resultado final anto, Santa Fe 4 – Unistars 2, p’asina titula campeon di Division Uno p’e campeonato 2021-2022, y invicto! pabien Santa Fe cu boso campeonato y tambe boso boleto pa Division Honor. Tambe un gran pabien na Unistars p’e esfuerzo grandi den e final aki, dunando nos un gran spectaculo, unda nos a sinja hopi di e concepto “deportivo” cu fanaticonan “gezellig” den un bon ambiente den stadion, algo cu no ta tur ora ta prevalece den Division Honor, esaki ta duna nos speransa, y nos deseo ta cu e Division Uno aki lo sigui progresa, locual lo yuda e division mas halto tambe.

SV Unistars – Sub Campeon Div. Uno – foto: Nathan Richards

Mientras cu Santa Fe ta promove automaticamente pa Division Honor, Unistars na su turno lo bai hunga den e playoff Promocion/Degardacion hunto cu Sporting, Estrella y United.

Un partido deportivo bon dirigi tambe pa referee Gilberto Spataro y ekipo di oficialnan, pabien na tur cu a presenta nos e bunita evento aki. Tabatin hopi bon desempeño den wega aki, man’e portero Maduro, Engelbrecht y Faustin di Unistars, of tambe Valderrama, Tromp y Lopez di Santa Fe, entre hopi otro nan. “King of the Match” di e partido final ta Marlison Hooi, e centro-delantero di Santa Fe, pa su esfuerso, creacion, su gol y asistancia tambe.

Atletico Santa Fe – Campeon – foto: Nathan Richards

Pabien Santa Fe, pabien Aruba.

 

 

 

 

 

Click to comment

Leave a Reply

Your email address will not be published.

More in AVB