Connect with us

Division Honor

Nos ta na mitar caminda di playoffs, Dakota ta keto bai na prome lugar riba tabla

Den resumen

E di tres fecha di playoffs Division Honor aparentemente lo tabata hopi decisivo pa determina e tabla di clasificacion, ya cu e lo a indica cual club lo consolida nan mes den prome lugar y cu cuanto punta di bentaha, y tambe kendenan lo bai ta batayando p’e di dos cupo den final (apesar cu ainda falta otro rond mas), “at least” nos lo sa ken ta e prome favorito grandi pa bai final, sin specula mucho.

Dakota a tuma e liderato y no kier lagu’e bai pa nada, te awor cu tres victoria den tres partido y nan ta gran favorito pa bai final. E otro puesto den final te cu awor ta un bataya grandi entre La Fama y RCA, helaas pa Britannia, cos no ta pinta mucho bon, except si “somehow” nan logra cuminsa gana y urgentemente, kizas hasta gana nan siguiente dos of tres partidonan (bala ta rondo, tur cos ta posibel), nan lo tin chens.

Esey ta e bista te cu awor na mitar di playoffs, e pintura ta biniendo cla poco-poco, e ta pinta bon pa algun pero no pa tur y e prome partido di e di dos buelta lo clarifica hopi cos, ban wak.

Davidson Kaarsbaan di La Fama y Nickenson Paul di Dakota – foto: Hubert de Cuba

 

Dakota vs La Fama

E partido aki tabata pa e prome lugar riba tabla, sea La Fama, si nan por sali victorioso den e partido aki, of Dakota kedando como lider cu ten minste un empate mes.

Partido tenso, apto p’un wega di playoff, cu bon ritmo, e ekiponan bon posiciona riba cancha, sin duna mucho espacio. Dakota dictando e tempo cu nan ritmo y velocidad, pero La Fama dispuesto na sorprende hungando un bon futbol fundmental, cu poco foutnan innecesario, exploitando “set pieces” (tiro liber, corner), cu disciplina.

Dakota tabatin e bala pa mas tempo, niun duda, pero no a haya nan yegada nan di custumber man’e tabata e caso den e dos prome weganan, esaki t’un otro contrincante, espacio reduci, cu bon defensa y un bon portero di banda di La Fama. 

T’a hopi esfuerso mes tabatin di banda di Dakota prome cu nan a yega na e prome gol di wega, y asina mes ora nan a haya nan gol, no tabatin indicacion cu lo bai tin mas, n’un manera e abehanan mester a satisface nan mes cu poco, ya cu La Fama nunca lo a bai duna nan nada por nada. E gol di Dakota a yega alfin na minuut 36, pa medio di nan Goleador maximo e anja aki, Sebastian Montoya, su di dos gol den tres partido di playoffs, despues di a anota 23 gol den campeonato regular.

Montoya ta haya un pase di Camilo Peña unda cu e ta hasi un tiro di distancia, net foi p’afor di area penal na banda robes, pon’e bala den net, un bala cu a pasa bai band’i tur hende y tambe portero Joshua Faro, man’e t’un tiro fantasma.

Justin Samson di La Fama y Fernando de Sousa di Dakota – foto: Hubert de Cuba

E partido ta sigui pareu, La Fama tabata duna hopi dolor di cabes cu tironan di skina, tiro liber, cu algun yegada tambe. Na dado momentonan Dakota a haya nan ta defende e minimo bentaha aki cu alma y cuerpo.

Joshua Faro – portero estelar di La Fama – foto: Hubert de Cuba

Al fin al cabo esey mes tabata e resultado final, unda Dakota a traha hopi duro pa bai cu e tres puntanan aki, pero nan a logra den nan partido mas duro te cu awor den playoffs. Dakota asina ta consolida nan mes den prome lugar cu 9 punta, La Fama en cambio ta keda den di dos lugar cu 4 punta. “King of the Match” ta Sebastian Montoya, un hungador cu por hasi un diferencia den un partido na cualkier momento.

Dakota lo hunga contra Britannia Diahuebs anochi y La Fama ta encontra RCA Diaranson anochi den un partido, kizas, decisivo.

Sebastian Montoya celebrando su gol hunto cu su companjeronan – fot: Hubert de Cuba

 

RCA vs Britannia

E partido aki tabata crucial pa ambos ekipo, e tabata suppose di determina ken ta bai bataya p’e di dos puesto y ken lo keda den bom. Di biaha RCA a tira den atake, toch un partido nivela den hopi aspecto, pero esey t’e caso den e prome minuutnan di un partido. 

Britannia a hasta anota gol prome, na minuut 12 caba, despues di un fayo den defensa unda Juel Balentien a probecha haya e bala bek den area penal, un poco na banda robes y ta hasi un tiro, hopi bunita mes, cu a banja e portero Samir Erasmus. RCA 0 – Britannia 1.

Despues di e gol aki, RCA a man’e lanta fei sonjo, nan a cuminsa cricula bala riba un tempo mas halto, cu pasenan skerpi. Solamente 9 minuut despues nan mes ta anota nan prome gol, un gol di nan goleador Jhon Silva, p’asina empata e wega na 1 gol pa banda. RCA 1 – Britannia 1.

Halftime ta bai aden empata na un gol.

Erik Santos di RCA – “King of the Match” – foto di archivo

RCA ta sigui den “high gear” den di dos tempo y ta cuminsa crea hopi mas chens pa anota, Britannia a man’e cai den otro, mustrando fatiga. E partido mes tabata sportief, cu poco incidentenan serio, poco carchi realmente, bon conduci pa referee De Leca.

Na minuut 66, RCA ta tuma bentaha despues di un gol di Erik Santos. RCA 2 – Britannia 1, e gol ey tabata parc’e e gol di knockout caba n’e momento ey. Britannia su rosea a caba, apesar cu RCA mes tabata parc’e flat den algun parti di e wega tambe. 

Jhon Silva di RCA – anotando gol keto bai – foto di archivo

E gol pa pon’e wega riba ijs a yega na minuut 86, un biaha mas pa Erik Santos, un tiro di distancia cu “spin” y hopi efecto a banja e portero Ruben Quero di Britannia. Esey tambe tabata e resultado final, RCA 3 – Britannia 1. Cu e resultado aki e tricolornan a acumula 4 punta pa empata cu La Fama riba tabla, pero a keda toch den di tres lugar debi na doel-saldo.

Nota: Ronald Gomez a re-aparece p’e ekipo di Solito den a partido aki despues di hopi tempo. “King of the Match ta Erik Santos pa su dobbel y su iniciativa positivo constante riba cancha.

RCA ta topa cu La Fama Diaranson anochi den un partido hopi importante, y Britannia ta enfrenta Dakota Diahuebs anochi pa trata na sobrevivi den un otro partido cu por dicidi nan destino.

 

 

 

Click to comment

Leave a Reply

Your email address will not be published.

More in Division Honor