Connect with us

Division Honor

Playoff final di Division Honor 2021-2022 a yega, Dakota ta enfrenta RCA p’e titulo

Dakota vs RCA - E clasico - foto: Hubert de Cuba

Un final Clasico

E gran final di Aruba su futbol alfin a yega, y e dos faboritonan grandi, Dakota y RCA, mes lo enfrenta otro den un serie final di dos partido di ida y buelta, y si tin mester lo hunga un di tres partido pa dicidi ken lo keda corona como campeon di Aruba p’e campeonato 2021-2022.

Dos ekipo cu tabata ‘cabes-cabes’ p’e liderato di e campeonato di Division Honor cu a cuminsa na October ultimo. E dos ekiponan aki a troca e prome lugar riba tabla den varios ocasion durante e campeonato, pero na final toch ta Dakota a gana e campeonato regular cu un bentaha di un solo punta (45 vs 44), y cos a keda hopi sera den doel-saldo tambe, Dakota +60 vs RCA +58, y apesar cu Dakota a gana den punta, toch RCA a sabi di gana di Dakota tur dos biaha den e campeonato regular

 

Dakota – Playoffs 2022 – foto di archivo

E bentaha “head to head” ey di e tricolornan riba e amarillonan a yega na su fin den e prome rond di e “round robin” unda cu Dakota a gana 3-1 den un manera convincente, pero, toch atrobe ta RCA a sabi di sali victorioso un biaha mas (apesar cu Dakota ya tabata clasifica pa final n’e punto ey) den e di dos wega di playoff entre e dos potencianan aki cu anotacion di 3-2, ganando asina e derecho pa enfrenta Dakota mes den e playoff final di Division Honor di e anja aki. Dakota por cierto a bolbe gana e tabla, di e prome fase di playoff, kedando cu 15 punta contra 13 di RCA, hopi sera atrobe cu Dakota c’un doel-saldo superior.

 

RCA – playoffs 2022 – foto di archivo

Enfin, awor nos ta n’e drempel di e playoff “serie” final unda tur logro anterior den campeonato of prome rond di playoff ta wordo “ge-stuf”, ya cu nos ta den comienso di un fase nobo y decisivo pa dicidi ken lo ta e campeon nobo di Aruba.

Ken tin e “edge”?

Unda e serie final aki lo wordo dicidi ta hopi dificil pa bisa, ya cu tur dos ekipo ta hopi bon prepara. Dakota cu su bon ofensiva y defensa, poder fisico y gran velocidad, RCA cu e wega mental cu poderio den medio campo, cu bon toke di bala, y nan ‘super defensa’. Un cos ta sigur, ta cu e ekiponan aki no ta hunga mesun tipo di futbol, nan ta dos contraste mehor dicho, pero e ta bai depende cual ekipo lo ehecuta nan plan di wega y tambe cual ekipo lo reacciona mihor ora cos no bai segun plan, of cual ekipo lo sa di probecha di e foutnan di e ekipo contrario.

Nos por spera un final clasico entre e dos ekiponan mas campeonil den historia di futbol di Aruba. Dakota ultimo biaha a gana e campeonato di Division Honor na 2018 y RCA na su turno na 2019.

 

Stiven Rua Melchor – volante di RCA – foto di archivo

Den e dos weganan durante campeonato regular cu RCA gana di Dakota, a keda demostra cu e club di Solito ta haya un manera of otro pa sali victorioso, esey ta un di nan forsanan, tabata parce tambe cu teniendo e control y hasta dominio di e wega den medio campo, cosnan tabata bayendo den direccion di RCA, hasta ora cu Dakota a gana e tabla di campeonato regular, semper tabatin un cierto bentaha p’e tricolornan, ta man’e nan tabatin e “edge” constante riba Dakota. E edge aki a parc’e cu a bira mas grandi cu e yegada di nan refuerso di custumber den playoffs, Stiven Rua Melchor, pa reforsa nan medio campo cu ta fuerte caba, ainda mas, un medio campo cu ya tin Jeamir Howell, hungado di seleccion nacional y Erik Santos, cu a bolbe bek foi un retiro cortico den e campeonato aki pa hasi otro tremendo trabou henter e campeonato.

 

Albert Francis di RCA y Derwin Donato di Dakota – Foto: Hubert de Cuba

E edge (bentaha) ey a man’e somenta den playoffs, pa ta precies den e prome encuentro entre e dos potencianan aki. Pero, kiko Dakota a hasi diferente anto? prome, Dakota a demostra hopi mas calma, mas pasenshi cu nan wega, nan no a pusha mucho duro di biaha, nan a man’e calcula mihor, sin riesga hopi hasiendo fout nan chikito cu RCA a sabi di probecha di dje den pasado, pero, tambe nan a trece un refuerso den e persona di Camilo Peña, un hungador versatil cu sa hunga rechtsback, pero ta hopi bon tambe den e rol di ‘volante di contencion’, p’asina yuda organisa Dakota mei-mei y alabes facilita Daniel Briceño, un bon hungador pa Dakota, p’e hasi su trabou den volante di creacion, Peña asina a duna e abehanan mas presencia den medio campo.

 

Jhon Silva di RCA – foto di archivo

E ‘wild card’ di RCA ta den nan delantero, apesar cu ya nan tin Jhon Silva, nan top goleador e campeonato aki, pero, e tricolornan por haya hopi ayudo mes di Albert Francis cu ta mas bien un centro delantero cu sa bringa bala dilanti y di un momento of otro por crea oportunidad p’e otronan of hasta anota su mes, e ta busca tur manera pa hasi algo, Francis por ta un clave p’e tricolornan den ofensiva.

 

Samir Erasmus di RCA y Fernando de Sousa di Dakota – foto: Hubert de Cuba

Dakota na su turno tin e trio den delantero, nan goleador Sebastian Montoya hunto cu Ricky Hodge y Fernando de Sousa, pero, si Dakota kier ta exitoso, nan mester pa De Sousa sigui hunga bon bala, De Sousa ya a bin ta hungando riba un nivel hopi halto foi parti final di campeonato regular te den e prome rond di playoffs unda e tabata e top goleador te cu awor cu seis gol den seis partido. Dakota t’e ekipo cu a anota mas gol den e campeonato regular tambe, 76 gol den 18 partido, impresionante.

 

Mark Jacobs – rechtsback di RCA – foto di archivo

Otro forsanan di RCA, claro, ta nan lateralnan, e hoben Alexsei Simmons, y Marc Jacobs, nan rechtsback, hungador importante p’e tricolornan, mientras mester resalta si cu RCA ta bai ta sin nan promesa hoben, Ludgenson de Cuba cu a bin ta hasi un bon trabou den volante den campeonato regular, pero e tin compromiso c’e seleccion nacional na pre-mundial U20 na Honduras. Pero toch no lubida e trabou di nan defensa en general, pero, cu emfasis riba e defensa central cu Roan Petronia y Nathan Lo-A- Njoe den control, RCA ta e ekipo cu a permiti menos gol den henter e campeonato regular, solamente 11 gol den 18 partido, increibel.

 

Nickenson Paul di Dakota  – photo: Nathan Richards

Dakota su variabel consistente e campeonato aki tambe ta nan defensa central, e dupla di nan capitan Ferdinant Robert y Nickenson Paul, un hungador di hopi “reach” y un velocidad descumunal cu por desequilibra e ekipo contrario ora c’e sali den atake. Dakota tambe a permiti masha poco gol den e campeonato regular, 16 gol den 18 partido.

Jeamir Howell di RCA y Derwin Donato di Dakota – foto: Hubert de Cuba

Den resumen

E final aki ta entre dos ekipo cu conose otro hopi bon, nan tin dos style di wega diferente, ta keda di wak ta ken ta bai probecha mas di e foutnan di e otro ekipo, casi sigur no ta bai ta mucho, e bentana di oportunidad lo ta masha poco. Ta man’e un wega di ahedres, Dakota cu su ofensiva potente, contra RCA su defensa hermetico, ken ta perde cabes y hasi erornan costoso? ken ta probecha mas di e oportunidad nan, hasta chikito, cu sa presenta nan mes durante un partido di futbol? ta cua hungador lo bira e poder desequilibrante? ken lo brilla? ban wak, nos ta den cuminsa.

 

Dakota vs RCA – foto: Hubert de Cuba

Diasabra t’e prome di dos wega di e serie final, si encaso e ekiponan keda empata na cantidat di punta despues di e dos weganan aki, lo bai hunga un di tres wega pa dicidi e campeonato. E di dos wega ta Diaranson dia 22 di Juni y si en caso mester un di tres wega, esey lo tuma lugar riba Diasabra 25 di Juni, tur wega ta cuminsa 8pm na stadion Guillermo Prospero Trinidad.

 

 

 

Click to comment

Leave a Reply

Your email address will not be published.

More in Division Honor