Connect with us

AVB

Dakota ta corona campeon di Division Honor, ganando RCA den un final pa prome biaha desde 1983

RCA vs Dakota den playoff final

Antesala di e final

Dakota ta campeon un biaha mas, nan di 17 titulo, e di dos ekipo rubiano cu mas campeonato den e top division di nos futbol, despues di nan nemesis tricolor, pero, nan no a gana RCA den un final desde 1983, te awor.

SV Dakota – P’atras L-R: Gikay Croes,Fernando de Sousa, Derwin Donato, Nickenson Paul, Camilo Peña, Resef Gross. Dilanti L-R: Daniel Briceño, Joshua Gross, Ricky Hodge, Ferdinant Robert, Sebastian Montoya.
(Photo by Nathan Richards/Futbol Aruba/DAC Image)

Nan a gana e ‘playoff final’ aki di RCA den un serie di ida y vuelta, unda cu nan a prevalece contundentemente cu un victoria di 4-2 riba e ‘tricolornan di Solito’ den e prome wega, y den e di dos wega (di buelta) aki, nan a empata 2-2 cu RCA p’asina keda corona como e flamante campeon di Division Honor 2021-2022.

SV Dakota, ta celebrando su di 75 anniversario di existencia e anja aki, ya e abehanan a caba e campeonato regular riba top di e tabla c’un bentaha minimo di un punta so riba RCA den ‘un careda di dos cabay, pero dos cabay di ‘pura sangre’, cu a dura henter e campeonato aki, casi ‘di punta pa punta’.

RCA – P’atras L-R: Eric Abdul, Marc Jacobs, Cristian Sinesterra, Jhon Silva, Nathan Lo-A-Njoe, Albert Francis. Dilanti L-R: Jeamir Howell, Alexon Simmons, Jean-Luc Bergen, Roan Petronia, Erik Santos. 
(Photo by Nathan Richards/Futbol Aruba/DAC Image)

Despues den playoff Dakota a bolbe gana e tabla cu net dos punta mas c’e tricolornan. E dos ekiponan aki ‘cabes-cabes’ henter anja, hasta den “doel-saldo” nan a keda casi pareu. Dakota tabatin e mihor ofensiva cu RCA net trei nan den di dos lugar, RCA en cambio e mihor ekipo defensivo e anja aki cu Dakota den di dos lugar den e departamento ey.

Pero, apesar c’e ‘amarillonan’ a keda riba top di e tabla den ambos ocasion, campeonato regular y playoffs, nan “head to head” tabata faborece e oncena tricolor mas bien. RCA tabatin e hegemonia riba Dakota, cu dos victoria den campeonato regular, pero, Dakota a logra kibra esey, con?

RCA vs Dakota – Respet pa himno nacional
(Photo by Nathan Richards/Futbol Aruba/DAC Image)

Mientras cu Dakota no a keda man crusa despues cu nan a realisa cu nan tin trabou pa hasi, nan a bai p’un solucion, y apesar cu nan ta un gran ekipo, fenomenal, toch nan a bai pa un variante mas, nan a busca Camilo Peña, e piesa cu nan tabata falta pa gana RCA. Peña a hasi Dakota mihor pa playoff, hunto cu Gikay Croes, portero suplente cu a trece calmo bou di e tres latanan, Peña y Croes tabata e ‘wild-card’ nan di Dakota, pa alfin duna nan un bentaha riba RCA.

Mientras cu Dakota a hasi nan mes mihor, cu “bold moves” pa gana RCA, e tricolornan mes no a logra hasi mesun cos, nan wild-card Stiven Rua Melchor no por a yuda nan mas cu algun wega so den final di campeonato regular (ganando di Dakota den un ocasion) y algun wega den playoffs, pero, nan no tabatin su ayudo den e weganan crucial aki contra Dakota (corda si cu futbol toch ta un sport di ekipo y un hungador so no ta gana wega, pero, un hunagor clave por ta e “missing piece”, e piesa cu falta pa gana).

E dos ekiponan aki a bataya otro henter e campeonato
(Photo by Nathan Richards/Futbol Aruba/DAC Image)

Ora mi a puntra Jonathan Lake, e DT Dakotero, na kiko e ta ‘credit’ e conquista di Dakota e anja aki, e ta indica cu tin demasiado hopi factornan, hopi hendenan cu a contribui, e cos aki ta un projecto cu a tuma tempo, tabatin hungadornan cu a sobresali henter campeonato, Lake ta apunta na e ‘trabou di ekipo’ p’afor di cancha y tambe riba cancha, foi directiva te cu e hungadornan, e simplente no kier a meciona un hungador riba un otro. Tur hungador a contribui nan un cierto momento, tin na cuminsamento y otro na final.

Riba cancha, Ferdinand Robert y Nickenson Paul tabata solido den defensa central, Sebastian Montoya y Ricky Hodge, e dos top goleadornan cu a “habraka” henter a campeonato, e yegada di Derwin Donato pa yena e bashi grandi c’e ausencia di Jean Pierre Heyden, e trabou incansabel di Resef Gross den linksback. E promocion di Gikay Croes como portero principal, conhuntamente c’e yegada di Camilo Peña, net prome cu playoffs a cuminsa.

Francis y Bergen di RCA conteniendo Gross di Dakota den e wega final di playoff.
(Photo by Nathan Richards/Futbol Aruba/DAC Image)

Daniel Briceño a hunga su rol man’e mester ta, como e principal medio campista di creacion y tambe contencion, nos a mira con e homber keto aki ‘trei cortina’ di Dakota a evoluciona e anja aki. Josha Gross cu su energia y velocidad foi medio campo, e sparkplug di Dakota, e regreso y renacimento di Fernando de Sousa, homber clave den di dos parti di campeonato y den full playoff, y no lubida e elenco di e back up nan, tur tabata importante cada biaha cu nan subi riba tereno pa logra e meta di ekipo aki.

Dakota tabatin e “luhosidad” di hunga pa dos posibel desenlace den e di dos partido di playoff aki, debi cu nan a gana e prome wega, nan por a opta p’un empate mes si tabata necesario y toch bai c’e titulo, RCA en cambio mester a gana e partido pa forsa un di tres clash decisivo, nan no tabatin otro choice.

Daniel Briceño y Jean Luc Bergen – bataya di dos medio campista – wega final di playoff
(Photo by Nathan Richards/Futbol Aruba/DAC Image)

E Partido

E prome gol a cai na minuut 6 caba, pero e tabata gol di Dakota. Un atake relampago riba banda drechi di RCA, Sebastian Montoya ta pusha e bala dilanti den area penal unda Ricky Hodge ta skop e bala, e ta dal den curpa di Eric Abdul cu tabata saliendo, den e bons di e bala, Joshua Gross ta los un tiro unda Abdul un biaha mas ta salba su porteria, pero, e bala ta desvia net riba pia di Fernando de Sousa na banda robes, unda e ta coloca e bala na banda di Abdul, cu tabatin un anochi sensacional, pa bai den net p’e 1-0, “driemaal is scheepsrecht” man’e ta bisae , Abdul ya no por a hasi e ultimo salbada aki. RCA 0 – Dakota 1.

Fernando de Sousa di Dakota – celebrando su prome gol di e wega final di playoff
(Photo by Nathan Richards/Futbol Aruba/DAC Image)

Despues di e prome gol aki, e wega a man’e baha di intensidad, Dakota mas conservativo, claro cu e bentaha den anotacion, pero a cuminsa duna tereno na e tricolornan, por a sinti cu RCA a cuminsa drenta mas den e wega, cu mas yegadanan tambe, pero toch halftime a bai aden cu Dakota den bentaha di 1-0.

Dakota celebrando nan prome gol,  R-L: Briceño, De Sousa, Gross y Donato.
(Photo by Nathan Richards/Futbol Aruba/DAC Image)

Den e di dos tempo RCA a cuminsa ta dicta e ritmo di wega, ainda buscando e empate, pero realmente ta un victoria so por a salba nan y forsa un partido decisivo riba Diasabra. Di biaha den un atake tabatin un cabesaso di Nathan Lo-A-Njoe cu ta dal den pal’i gol, casi RCA ta empata e partido. Un rato despues ta Jhon Silva ta horta e bala foi Nickenson Paul y ta sprint bai den atake y Ferdinant Robert cu un ultimo suspiro ta desvia e bala foi pia di Silva, pero, e bala ta cai riba pia di ‘Killer’ Francis cu ta los un tiro pero Nickenson Paul cu a sprint bin bek patras ta desvia e bala, atrobe, na ultimo momento y mand’e bala corner.

Jeamir Howell y RCA a responde cu atakenan – Wega final di playoff
(Photo by Nathan Richards/Futbol Aruba/DAC Image)

Momentum awor ful di RCA, y alfin na minuut 62 den un di e tanto atakenan tricolor, un bala den aire den area penal cu ta dal den brasa di Fernando de Sousa y referee Ricky de Leça ta otorga un penalty na RCA. Jean-Luc Bergen ta anota e penalty pa empata e partido 1-1.

RCA ta sigui insisti y mas atakenan ta continua cu yegada den e zona di peliger, Dakota defendiendo e empate y RCA buscando e victoria pa keda na bida den playoffs y forsa un partido mas. Siguientemente ambos ekipo awor a haya chens di gol pero e trabou di RCA alfin a duna fruta, nan ta haya un penalty ora cu Jeamir Howell a penetra den area penal y ta wordo tumba abou p’un falta, unda cu Jean-Luc Bergen a bolbe anota pa hasi e wega 2-1 pa RCA na minuut 73. E tricolornan awor den control pa forsa un partido mas.

Jean-Luc Bergen anotando su gol di penalti pa duna RCA chens pa un partido decisivo – wega final di playoff
(Photo by Nathan Richards/Futbol Aruba/DAC Image)

Dakota no a “give up” despues di perde e bentaha cu nan tabatin y e chens pa titula campeon e anochi aki mes. Un partido di banda pa banda awor p’aso RCA tampoco a hala atras pa defende e resultado.

Con cu bai cu bin, Dakota a cuminsa lansa mas den atake, den un hugada cu a cuminsa cu Daniel Briceño unda e ta hasi un tiro duro cu Eric Abdul ta blokea, e bala ta bons sali riba pia di Ricky Hodge cu ta den area penal caba, Hodge ta purba di schijns Alexon Simmons cu a baha pa defende, e bala ta bai largo na banda robes, pero, net pa Fernando de Sousa cu ya tabata eynan, e ta blaas e bala den net, un tiro violento, pa anota e gol di empate na minuut 85, RCA 2 – Dakota 2.

De Sousa di Dakota batayando cu Lo-A-Njoe, Sinesterra y Simmons di RCA
(Photo by Nathan Richards/Futbol Aruba/DAC Image)

Dakota a empata e partido “somehow”, ta net precies locual nan tabatin mester pa corona campeon e anochi aki mes. E gol a sacudi RCA, net ora nan tabata asina serca di forsa un di tres wega di playoff final, Dakota no tabata kier a bai e wega final ey, nan fanaticonan tabata kier a celebra e anochi aki mes, nan a yega stadion den masa, Fernando de Sousa a contesta nan plegaria.

De Sousa y Montoya di Dakota ta euforico despues di e gol di empate – wega final di playoff
(Photo by Nathan Richards/Futbol Aruba/DAC Image)

Dakota a wanta e resultado pa ora cu arbitro De Leça a fluit p’e final di e partido, poniendo fin nan un bataya fenomenal entre e dos ekiponan grandi aki di Aruba, dos ekipo cu a core banda di otro casi di comienso te fin, foi October di anja pasa te awe dia 22 di Juni, ta hopi tempo nos no a wak un careda asina sera, pero, Dakota ta regala nan fanaticada e trofeo di campeon aki pa celebra nan di 75 aniversario.

Pabien SV Dakota cu e titulo aki, nan a demonstra cu pa gana un titulo ta henter un organisacion mester traha hunto, no solamente e hungadornan riba cancha, pero tambe p’afor di cancha, bestuur hunto cu e staff, e hungadornan mes tambe y e fanaticada, un team-work completo, c’un vision di campeon. E ‘amarillonan’ ta lanta e trofeo ey pa di 17 biaha, desde nan prome na 1961, awor atrobe, algo digno di un celebracion grandi.

E fanaticada “amarillo” a yega den gran cantidad pa celebra e campeonato aki.
(Photo by Nathan Richards/Futbol Aruba/DAC Image)

Gikay Croes tabata un positivo grandi den e playoffs nan aki, ademas tambe di Camilo Peña, cu a trece pa Dakota e “missing piece” den e oncena, locual nan tabatin mester pa gana RCA, pero, e “Man of the Match” den e wega aki y tambe e MVP di e playoff di Division Honor ta Fernando de Sousa, e delantero venezolano di Dakota, cu 2 gol den e wega aki, y tambe 9 gol den e ocho partidonan di playoff, pabien!

SV Dakota ta campeon di Aruba pa di 17 biaha, for di nan prome na 1961, awor un biaha mas.
(Photo by Nathan Richards/Futbol Aruba/DAC Image)

Resumiendo

Pa corona campeon, Dakota mester a sali ‘todo por todo’, nan mester a traha hopi duro mes, nan mester a planea y pensa, bira mas creativo, pa hunga contra RCA, nan nemesis grandi.

E tricolornan no ta cualkier ekipo, nan ta e campeon di Copa Betico 2022, tambe nan a caba henter e campeonato 2021-2022 invicto, niun hende no por a gana nan den campeonato regular, ni Dakota mes (nan a perde dos biaha cu RCA), apesar cu toch Dakota a gana e campeonato regular cu solamente un punta mas, pero, globalmente, incluyendo tur e weganan di playoff, den 6 partido den e campeonato aki, RCA a gana tres biaha, Dakota dos biaha y un empate (e wega decisivo aki).

Un final inolvidabel pa Dakota – hungadornan y fanaticada, trabou di ekipo ta rekeri un bon celebracion.
(Photo by Nathan Richards/Futbol Aruba/DAC Image)

Loke ta ilustra akinan ta cu Dakota a logra algo hopi grandi y nan merece, p’aso nan a traha p’e, ora cos no a bai bon, nan a sa di corehi nan debilidad nan, hasi decision nan grandi y dificil, pa mehora, pa sali campeon, pa gana ora mester, n’e momento perfecto.

RCA ta un gran ekipo, pabien na e organisacion y tambe na nan coach Maurice Escalona, nan no tin nada di tin berguensa p’e, nan tambe a gana hopi e campeonato aki, na final ta djies cu Dakota tabata mas oportuno n’e momento indica, e biaha aki, y nan ta e campeon nobo di Aruba.

E gesto di e capitan tricolor Jeamir Howell-Brokken despues di e partido, pa bai te dilanti di e fanaticada di Dakota pa felicita e hungadornan di Dakota y nan fanaticadanan mes tambe ta algo grandi, decoroso, sportief, heorico, Howell y RCA lo ta bek, keremi, pero p’awor ta Dakota ta campeon.

Capitan di Dakota – Ferdinant “Boca” Robert cu e trofeo di campeon hunto cu e fanaticada geel cu preto den celebracion.
(Photo by Nathan Richards/Futbol Aruba/DAC Image)

Mi no tin suficiente elogio p’e organisacion di SV Dakota, nan a pon’e e meta pa gana e titulo den nan di 75 anniversario, esey tabata e ‘tema central’ di nan tur; Gilmar Croes, Carmichael Bikker, y coach Jonathan Lake. Coach Lake mester di hopi elogio mes, pa su positivismo, vision y management moderno, un persona cu ta willing pa adapta, pa bai bek n’e “drawing board” mes si mester, pa ta creativo, pa busca solucion y yega na exito, pabien na nan tur. E campeonato 2021-2022 di Division Honor ta un di e mas interesante nan di tur tempo, wak e statistiek nan pa boso mes, wak nan.

Te aki tambe nos a yega cu e campeonato 2021-2022 – te otro biaha cu FutbolAruba, bo fuente di futbol na Aruba, futbol ta pasion.

 

 

 

 

 

 

 

Click to comment

Leave a Reply

Your email address will not be published.

More in AVB