Losing 1-3 in a competitive match, away to a team that is ranked 130 places higher than you is no small feat, that is something to put in context. For a small upcoming team like Aruba, that is a very good accomplishment, a base to work from.
–
Full original report and stats in Papiamento
–
Aruba a cuminsa e wega cu hopi iniciativa bayendo dilanti tratando di sorprende Panama, un poco pressing halto a duna bon resultado p’e oncena Arubiano trempan. Na minuut 5 e esfuerzo a duna fruta ora cu un tiro riba gol di Bonny Lammers a dal den un defensor Panameño, bay cai dilanti Vanessa Susanna net na rand den e area penal, e ta los un tiro cu a blaas e net, un gol potente p’e 1-0 p’a Aruba.
Panama a sali di biaha p’e contesta y a cuminsa un dominio cu bala, cu hopi yegada, producto di un pressing halto p’a evita salida di Aruba foi nan mesun teritorio, nan cuminsa gana y tene e bala y hopi yegada, p’esey tabatin asina hopi corner, Aruba a defende duro.
N’a minuut 16, e estelar hungador Riley Tanner t’a anota e gol di empate pa Panama, un gol unda full e defensa di Aruba a move direccion di nan porteria c’e hungadornan di Panama, mientras cu Tanner,un hungador astuto, ta fake y trek bek, hasiendo su mes liber den area penal, a ricibi e bala for di Sherline King y deposita e bala den net p’e 1-1.
E dominio Panameño ta sigui, Aruba no tabatin contesta,y na minuut 29 Panama ta anota otro gol, di cabes, foi un angulo casi imposibel di e hungador Arlene Hernandez p’e 2-1 p’e ekipo di cas, asina tambe halftime a bay aden na Stadion Universitario na Penonome.
–
Hadassah Kock, portero di Aruba ta logra trece salbacion mei mei di hungadornan di Panama – foto cortesia FEPAFUT
–
Den di dos tempo Aruba a bin c’un otro pensamento, un otro dinamico, nan a logra gana mas di e bala, retene y distribui mihor, Panama a purba press atrobe pero cu menos efectividad e biaha aki, Aruba tabata haya salida, y asina e wega a sigui. Pa gran parti di e di dos tempo e tabata un wega pareu, cu ambos ekipo cu avanse y yegada, Aruba igual of kizas hasta un tiki mihor cu Panama.
Na minuut 73 Panama ta haya un pinalti hopi dudoso mes. Un falta busca y fabrica p’e hungador Tanner di Panama, pero ya futbol t’asina, for di su angulo e referee no por a wak cu tabata un “dive” di e hungador Panameño, Tanner a hasta dal un of dos paso prome cu el a cay na suela despues di un “stootje” leve di e defensa Genesis Hazel di Aruba, si tabatin VAR otro gai lo a canta y Tanner lo a hasta haya un carchi geel p’a su teatro. Esaki a danja e momentum hopi bon di Aruba, pero e no ta refleha e realidad.
–
Aisse Gumbs di Aruba batayando cu Katherine Castillo, e capitan di Panama – foto cortesia di FEPAFUT
–
Enfin, Karla Riley t’a anota e gol di pinalti pa Panama pa hasi e wega 3-1 nan nan fabor.
Aruba ta sigui purba, e wega a sigui pareu. Por bisa libremente cu akinan Aruba a sa di madura, nan wega tabata e mihor cu por a wak di nan den tur nan weganan, y esaki contra un rival di nivel hopi halto den Concacaf y ta 56 den FIFA ranking, 130 puesto mas halto cu Aruba cu ta na posicion 186, hopi significante!
Partido ta termina 3-1 na fabor di Panama, mereci, si, pero, Aruba mester por realisa cu nan ta hopi mas mihor cu nan mes a pensa y tambe mihor cu e ranking ta bisa. E ekipo Arubiano a laga tur cos riba cancha, nan a duna tur cu tur den e wega. Aruba ta keda cu tres punto den di tres lugar riba tabla di posicion.
E siguiente partido di Aruba ta contra Korsou, den e ‘derbi antiyano’ na Willemstad, dialuna benidero pa 8pm.
–
Heat map di e di dos tempo di e partido Panama vs Aruba
–
Resumen:
⚽5′ Vanessa Susanna ARU ⚽16′ Riley Tanner PAN ⚽29′ Arlene Hernandez PAN ⚽73′ Karla Riley PAN (p)
🟨’52 King PAN 🟨’87 Doornkamp ARU 🟨’88 Jaen PAN 🟨’90+4 Gonzalez PAN
–
