Connect with us

Division Honor

Antesala di play-off 2018 – Nacional vs Dakota

Nacional enfrentando Dakota den e di dos wega di play-off 2018 ta promete di ta bay ta un ‘clash di titan nan’, e lo ta tambe un exhibicion di dos ekipo cu wega bastante diferente den hopi aspecto, dos ekipo cu ta conoci di ta protagonista den weganan di play-off. Nacional, e actual campeon di Aruba, cu a sabi di gana varios campeonato caba den temponan recien, contra Dakota, un di e dos ekiponan mas ganado di campeonato di Aruba (hunto cu RCA), pero Dakota tambe a pasa hopi tempo sin logra un titulo.

Dia cu Dakota a gana Nacional convincentemente 3-0 den e prome mita di campeonato ta hopi a bisa cu Dakota ta bay ta e ekipo faborito e anja aki. Dakota a hasta caba e prome rond solido den prome luga riba tabla. Despues di un periodo duro den e di dos mita di campeonato, e ekipo Dakotero a perde e prome puesto di clasificacion pa algun siman pa despues cuminsa un racha di cuater victoria sigui, pa culmina e campeonato pa gana e prome luga toch. Significante tambe ta cu den e racha dificil ey di Dakota den e di dos mita di campeonato, Nacional a empata cu e abejanan 1-1 den un wega duro y hopi competitivo riba un anochi di awacero cu dos mita hopi diferente, e prome mita cu Dakota hungando nan wega di posesion y atake di velocidad, y un di dos mita cu Nacional dominando e medio campo cu pressing halto y un Dakota replega den defensa.

Nacional a caba e campanja regular den di tres luga pero cu un diferencia minimo di punto entre nan cu Estrella y Dakota. Nacional mes a resurgi enormemente despues di a cuminsa e temporada un poco slow. Despues a ingresa Devis Oliveros, e ganado di e prome edicion di Balon D’Or anja pasa, bek den e plantel di e ekipo Nortero. Oliveros hunto cu Kenroy Ranger, e maximo goleador di Aruba e anja aki a hasi e deshasi den delantero anotando entre nan dos un total di 30 gol, impresionante. Nacional ta e ekipo mas goleador di Division Honor e campeonato aki, nan wega ta uno di pressing y halto, dominio den medio campo ancra pa nan capitan Valdo Leocadio, di berdad un personahe importante pa e wega di Nacional, Leocadio por hunga den volante di creacion y tambe contencion, y hasta por subi pa anota gol si mester tambe, un motor sin duda, fisicamente hopi duro, contribuyendo na e tactica ey di e Dragon nan.

Pa Nacional ta importante pa nan intercepta e bala na mita di tereno, y ta den control fisico di e medio campo. Otro personahenan clave pa e wega di Nacional ta Deffery Banton y Edward Clarissa. Si ta conoci cu Nacional ta anota hopi gol cu e wega di hopi energia y presencia fisico, necesario pa hasi pressing, bo por ta sigur cu balanan ta bay wordo intercepta y distribui pa e dupla di Oliveros y Ranger dilanti, mester indica tambe cu Nacional a permiti 24 gol ‘en contra’ , kiermen cu e wega di pressing halto sa faya, e tin risico, y bo ta haya balanan ta pasa bo medio campo pa chens di gol den bo contra, pero, pa Nacional e anja aki el a traha, nan ‘doel saldo’ tabata +25 pa henter e campeonato, e miho di Division Honor. Si no ta pa e viahe cu Nacional a hasi pa bay hunga den e torneo Concacaf “Caribbean Club Shield”, combina cu e tres weganan di e campeonato akinan, hungando 8 wega den menos cu 20 en total, Nacional por a demonstra mas na final, pa nan tabata toch mas importante pa drenta play-off, ‘sea lo ke sea’.

Dakota despues di a impresiona den e prome mita di campeonato, a cai un poco den nan wega, a bin un racha di perdemento di punto, y a cai den e tabla, a haya falta sin duda di e wega di control y distribucion di e talentoso Jesus Peñate cu su partida pa Hulanda. Nan promedio di gol a baha drasticamente, nan a logra anota toch 38 gol, no mucho halto, pero mester bisa tambe cu Dakota tin e miho defensa di Aruba tambe, nan a permiti solamente 17 gol den nan contra, pa un ‘doel saldo’ di +21. Dakota ta depende di nan velocidad y bon defensa ancra pa e talentoso Paul Nickenson y capitan Ezra Bosnie, cu porteria solidamente defendi pa Eric Abdul y Lionel Kaarsbaan. Dilanti ta unda Dakota por exlora hopi cu e velocidad di nan goleador Ricky Hodge y e hoben velocista Sherman Monticeuex.

Importante si ta e wega mental di Dakota, pa mantene nan disciplina riba tereno. No tin duda cu pa interumpi nan wega di velocidad ekiponan contrario lo purba usa forsa fisico, dentro di tur regla den un deporte di contacto sin duda, pa desequilibra e geel cu pretonan, y baha asina nan velocidad y ofensiva. Ta keda na Dakota pa sabi di hunga cu esey, pa no perde cabes y perde concentracion cu por afecta e resultado final.

Ban wak kiko ta pasa entre e dos ekiponan aki cu systemanan di contraste, e wega den siman 11 cu a caba 1-1 por ta unda e ekiponan aki a sinja hopi di otro pero tambe di nan mes, nos lo wak anto.

 

Click to comment

Leave a Reply

Your email address will not be published. Required fields are marked *

More in Division Honor