Connect with us

Division Honor

Parce cu Stanley Menzo por bira e ‘bondscoach’ di seleccion di Aruba

Na e prome training oficial di e seleccion di Aruba, cu temporariamente ta wordo dirigi pa David Abdul y su ekipo di coach nan di ‘AVB Academy’, ya cu ainda no tin un director tecnico oficial despues di e salida di Martin Koopman. Pero, tin indicacion nan fuerte cu e seleccion lo bai haya un bondscoach nobo y ta parce cu ta Stanley Menzo, apesar cu esey no por a wordo confirma ainda.

 

Elvis Albertus, Stanley Menzo, Richard Dijkhof @2015

Stanley Menzo, un ex hungado hopi conoci cu a milita den e famoso club Ajax Amsterdam y tambe brevemente den Oranje (seleccion di Hulanda) na 1980’s y 1990’s, a nace na Paramaribo, Suriname na 1963. Menzo a wordo escogi pa e legendario Johan Cruijff pa bira portero di Ajax na 1985-1986 y pa shete anja sigui tabata titular, ganando campeonatonan di Eredivisie y KNVB Cup, Copa Europeo di ganado di Copa (European Cup winner’s Cup) 1986-1987 y tambe UEFA Cup (awendia Europa League) 1991-1992, ganando di Torino di Italia den final.

 

Menzo den su carera di coach a dirigi y a traha entre otro na Volendam y Cambuur den Eerste y Eredivisie, Lierse na Belgie, Ajax Cape Town na Zuid Afrika y ultimamente na China cu Beijing Gouan, ademas tambe cu ‘Oranje’ como trainer di keepers tempo cu Van Basten tabata Bondscoach.

 

E yegada di Menzo na Aruba por yuda hopi pa cambia e direccion di nos seleccion nacional. Segun David Abdul; si esey wordo concretisa, Menzo por trece cu n’e e elemento di e comprencion di e cultura regional debi na su origen di Suriname y tambe esun Europeo debi cu el a biba y traha eynan pa hopi tempo.

 

Aruba actualmente ta rank number 31 den Concacaf y 200 riba e lista di FIFA. Un isla chikito pero cu semper a sabi di aprecia futbol, cu un tradicion hopi bon mes den e deporte mas popular riba e isla; cu a produci hungadonan man’e Pupi Diaz, Ange Perez, Edwin Dirksz, Juancho Pablo entre otronan. Ta tempo pa nos busca gloria futbolistico atrobe.

Click to comment

Leave a Reply

Your email address will not be published. Required fields are marked *

More in Division Honor