–
Full report from Papiamento
–
Nan di dos titulo sigui, Back-to-Back pa Dakota. Un partido cu tabata cera na cuminsamento, La Fama c’un “edge” chikito den e prome tempo, nan wega di pressing efectivo, y esey a keda demonstra tambe den e anotacion na halftime di 2-1 na nan fabor. Pero, futbol t’un wega di dos tempo, den e caso aki hopi mas, incluyendo e “proroga”, y den e siguiente fasenan di e partido, Dakota a demostra c’un ekipo profundo, cu bon strategia, den bon condicion fisico y cu cambionan acerta, bo ta semper den e partido, y dicho-hecho, nan a bin bek y a gana e wega n’un manera contundente y bon mereci. Dakota a haci nan “business”.
–
Un prome tempo unda La Fama a impone un pressing hopi efectivo, strobando Dakota di hunga nan wega. Ambos ekipo cu hopi bon yegadanan, practicamente un wega di banda pa banda unda Anthony Walsh, Dixo Ordonez, y Marshino Koorndijk den defensa di e ekipo Savanetero, a domina conhuntamente, e medio campo y e linea defensivo, dilanti, Gregory David y vooral Tinadio Makanzu a duna hopi dolor di cabes n’e defensa Dakotero, algun biaha nan a haya nan mes ta double-team e hungador Canadees di descendencia Africano aki, habriendo espacio p’e otro hungadornan di La Fama.
–
Tinadi Makanzu di SV La Fama, dominando trempan den e final Copa Betico 2026 – Foto cortesia DAC
–
La Fama a anota e prome gol di e wega na minuut 34. Un tiro liber basta p’afo di e area penal di Dakota, sigur un cinco meter nei leu di e media luna, unda Gregory David ta pon’e e bala den nobenta na band robes, unda Kendrick Dania no por a yega nunca, un “sambombaso” cu a pon’e net bula p’e 1-0 p’e ‘speransa berde’. La Fama 1 Dakota 0.
Dakota a responde di biaha despues di e gol di La Fama (35′), den un par di seconde nan a haya un apertura grandi, mientras cu ainda La Fama no a caba di celebra drechi, pero, e momento cu referee a fluit p’e wega sigui bo ekipo mester ta cla. Daniel Briceño ta hasi un p’ase na banda robes, unda e ta haya dos hungador Dakotero, Sebastian Montoya y Woodeney Jean Baptiste contra un defensor Savanetero, Montoya ta laga e bala bai door pa Jean Baptiste, pa ora e portero y dos otro defensor a sali ataka, Jean Baptiste ta “loft” e bala, un sombre riba tur nan cabes poniendo e bala den gol na banda drechi p’e empate. La Fama 1 Dakota 1.
Toch La Fama ta sigui t’e ekipo un “tiki” mas peligroso den e prome tempo. Nan ta sigui insisti y den un momento net prome cu halftime, minuut 45+1, unda Makanzu ta penetra ful na banda drechi di e area penal di Dakota, e ta hala dos defensor cun’e y ta causa un descontrol grandi den e area penal, pero e ta retene e bala y cu bon vision e ‘lider di asistencia’ ta crusa asina mes, stret pa Gregory David cu ya tabata mei mei den area penal, e ta ricibi e bala y ta deposit’e facilmente na banda drechi di Kendrick Dania p’e bentaha atrobe. La Fama 2 Dakota 1.
–
SV La Fama celebrando nan bentaha den e prome tempo – Foto cortesia DAC
–
Den e di dos tempo La Fama ta sigui c’e mes’un wega, Makanzu ta sigui pon’e hopi presion riba e linea defensivo Dakotero. E hungador aki ta redefiniendo y accentuando con dominante un rol di 9 por ta, unda no solamente e por anota, pero mas bien e ta bon den recupacion y tambe den retencion y control di e bala, cu pasenan di calidad, e ta hasimi corda Albert “Killer” Francis den algun sentido. Dakota somehow mester a busca un manera pa soluciona e situacion aki y liher, p’aso si no e wega lo a slip for di nan gara, pero nan hasi algo.
Na minuut 66 DT Jonathan Lake a hasi dos cambio, el a trece Camilo Peña y Over Garcia den e partido, ken sa si esey mes tabata e strategia di e wega di Dakota di cuminsamento caba, p’aso e ta parc’e mas e plan A, djies cu nan kier a hasie mas laat den wega, p’aso cu nan yegada, e dinamico di e partido a cambia por completo. No cu Dakota tabata hungando malo, al contrario, nan tabata igual igual cu La Fama, pero La Fama a capitalisa di e bon wega di Makanzu, e tabata e diferencia entre e dos bon ekiponan aki. Pero, p’e resto di e di dos tempo e olanan a cuminsa kibra mas na fabor di Dakota.
–
Woodeney Jean Baptiste di Dakota y Anthony Walsh di La Fama den duelo den final Copa Betico 2026 – Foto cortesia – DAC
–
Camilo Peña vooral, a cuminsa recupera y proteha e bala, dunando Daniel Briceño mas tempo y espacio pa crea y distribui mihor foi medio campo, no cabe duda. Over Garcia a duna mas poder di contencion halto, limitando salida di La Fama, nan a man’e choka Walsh y compania for di e momento ey, nan no a haya mucho di e bala mas, at least no man’e den e prome half y cuminsamento di e di dos tempo.
Dakota cu mas empuhe y yegada a empata e partido na minuut 80 pa medio di Daniel Briceño mes, ya e tabatin un assist den e wega caba. Despues di un tiro riba porteria y rebote den area penal, Briceño ta haya e bala y ta los un tiro pa blaas e net p’e gol di empate, La Fama 2 Dakota 2.
E partido a termina empata na dos gol den tempo reglametario, mester a hunga dos tempo extra di 15 minuut cada un. Pero, apesar di e empate provisional, por a sinti caba cu ‘e ola a bolter’ y tabata question di tempo so pa Dakota tuma ful control di e partido aki, y nan a hasi exactamente locual nan mester a haci.
–
Daniel Briceño di Dakota den control – Final Copa Betico 2026 – Foto cortesia DAC
–
Dakota a domina den e tempo extra, nan a demostra cu nan ta den bon (mihor) condicion fisico tambe, un aspecto mas cu ta na nan fabor e campeonato aki. E di tres gol di Dakota a yega na minuut 92, un cruce perfecto di Joan Velez, rechtsback di e ‘geel cu pretonan’. E bala a wordo pon’i den box pa Over Garcia cu no a basila y ta pon’e e bala den net p’e 3-2 na fabor di Dakota. La Fama 2 Dakota 3.
Pero ainda tabata falta mas den e tempo extra di e partido, e stokada final. E cuarto gol di Dakota a drenta na minuut 111. Camilo Peña ta gana e bala den medio campo, e ta dribble un poco den teritorio di La Fama, e ta mira Shemar Monticeuex ta coriendo su dilanti, e ta loft y coloca e bala net dilanti di Monticeuex cu ta penetra, schaak e portero Josua Faro y ta coloca e bala den net pa aumenta e bantaha cu dos gol. La Fama 2 Dakota 4.
–
SV Dakota ta “back-to-back” campions di Copa Betico – Foto cortesia DAC
–
Algun atake y yegada mas di La Fama no a duna fruta, e historia tabata scirbi caba, Dakota ta campeon di Copa Betico pa dos anja consecutivo, nan ta “back-to-back champions”. Dakota ta gana e partido 4-2, un victoria decisivo, pero La Fama mester di mencion si, nan ta riba caminda pa cos nan grandi, pero Dakota ta keda e “top-dog” di futbol Arubiano, esey ta sigur.
Bon actuacion di cuerpo arbitral tambe, Aaron Stamper cu bon desempeño. Pabien Dakota y pabien La Fama.
–
Hungadornan di SV Dakota ta celebra cu Jonathan Lake cu un titulo mas com DT – Foto cortesia DAC
–
Recap:
⚽34′ Gregory David LAF ⚽35′ Woodney Jean Baptiste DAK ⚽45′ Gregory David LAF ⚽80′ Daniel Briceno DAK ⚽92′ Over Garcia DAK ⚽111′ Shemar Monticeuex DAK
🟨88′ Peña DAK 🟨120′ Rangel LAF
