Pakiko Futbol Aruba ta bek c’un mission nobo – un comentario
Futbol ta cla pa “kick-off” un biaha mas y Futbol Aruba t’ey bek pa conecta e atletanan di e deporte rey, cu e publico y e fanaticada en particular.
Despues di un ausencia di dos anja Futbol Aruba, un fundacion pa yuda mehora futbol, ta bek cu e meta principal pa promove futbol, p’a yud’e deporte recobra su alma y alcansa e nivel mas halto, pa gana e curason di e publico.
Den un mundo di deporte mas competitivo cu nunca, otro deportenan tambe ta pushando duro p’e atencion di e publico, y hasta mi tin cu admiti, cu algun kizas a crea un “edge” chikito riba nos deporte rey, e bentaha por ta debi na e “branding”, kizas e imagen di e deporte. Nos tin trabou pa hasi, no tin duda, den un mundo cu mas y mas ta depende riba media social technologico, cu diferente metodonan pa alcansa y gana e atencion di e publico en general.
Futbol local tin hopi mas participacion, informacion y fuente visual cu antes, esey ta bon! nos a progresa, esey mes tabat’e motibo cu stichting Futbol Aruba a wordo funda casi un decada pasa. E tempo ey Futbol Aruba a mustra e entidad organisativo di e tempo ey, con pa informa e publico mihor y conecta e protagonista di e deporte, e hungador di futbol, cu e fanaticada.
A reta y presiona n’a un manera positivo, e curpa organisativo, hasta contra biento y marea, y boluntario, pa mustra con pa hasi e trabou efectivo, pa mantene un website, con pa pon’e potret, aplica otro arte visual nan, mantene resultado y statistiek nan na tempo, pero mas importante, con pa duna atencion n’e ‘hungado di bala’, e protagonista principal den e storia aki, p’a recompensa y premia nan tambe p’e logronan y pa entretene nos.
Den e ultimo anjanan apesar di hopi actividad, e ambiente di futbol a man’e bira un poco mecanico y hasta monotono. Tin hopi mas informacion disponibel, pero a ‘perde e alma’ somehow, Futbol Aruba kier coopera y yuda, p’e causa general.
Raymbert Bikker y Davyne Croes, hunto cu otro boluntarionan a cuminsa atrobe c’e stichting. E obhetivo principal e biaha aki ta pa crea un ambiente, un esfera excitante, pa conecta cu e publico, pa yuda e deporte rey competi p’e atencion c’e merece, e coneccion ey ta necesario tambe p’e participacion di e futuro generacion. Nos tur den e deporte di futbol mester traha hunto cu e voetbal bond pa yega na bon resultado.
Futbol ta conosi rond mundo, e ta e ‘deporte rey’ sin duda, tin mas futbol den tur media cu tur e otro deportenan combina. Copa Mundial y Champions League t’e eventonan deportivo mas grandi y mira na mundo, esey ta hopi bon, pero e ta algo di exterior. Pa resona y haya resultado localmente t’un otro cos, bo mester hasi bo branding insular, conecta y interactua cu e publico local ta hopi clave.
Venezuela ta un bon ehempel cu nos por sinja di dje. Den anjanan 70 y 80 mi kier sa cu nan tabata un di e paisnan cu mas tabata cubri ‘mundial di futbol’, tabatin hopi sen disponibel tambe. Tres canal di television tabata competi y transmiti tur e partidonan di mundial. Mi ta corda cu na un mundial Pele a comenta en bibo pa Radio Caracas TV, Alfredo Di Stefano cu Venevision y keremi, Helenio Herera a comenta pa VTV (CVTV), tur n’e mesun mundial! E pais tabata paralisa den e dianan di e torneo magno di Futbol.
Asina mes Venezuela nunca a bai un mundial nan mes, e cobertura sensacional di e mundial nan no hasi mucho p’e deporte local. Den pasado nan torneo nacional di Futbol no tabata hala atencion man’e Baseball tabata hasi, e deporte ey semper a keda riba Futbol como e number un n’e pais bisinja. Ta te den e ultimo 30 anja cu a cuminsa cultiva Futbol n’e manera apropia, foi e nivel hubenil, algun hungador Venezolano a hasta bai hunga den e liganan mas grandi na Europa, por ehempel Juan Arango y Salomon Rondon, a mehora e liga nacional, purba na crea un mihor structura y branding, un mihor coneccion cu e publico. Si e pais ey por yega na resolve nan situacion social-economico mi ta kere cu nan futbol por subi n’e siguiente nivel den un futuro cercano.
Sigui Futbol Aruba, conecta riba e social media di Facebook unda Raymbert Bikker y ekipo lo tenebo al tanto di tur locual ta acontenciendo den e deporte rey na Aruba. Adicionalmente, nos meta cu e website, un poco limita compara cu antes, ta pa informabo, den dos lenguahe; Ingles y Papiamento, di e schedule nan benidero y e resultado nan di cada partido hunga, primordialmente di Division Honor, hunto c’un comentario cortico.