Seleccion femenino di Aruba ta rib’e drempel di cuminsa un fase nobo den ‘Concacaf 2025-2026 W Qualifiers’

E ekipo aki por ta e prome fruta anhela di hopi trabou, riba veld y trei cortina, cu a cuminsa varios aña pasa?

–

Esaki ta un era nobo, sin duda, unda Aruba no ta un ekipo chikito mas den e region di Concacaf, nan kier hasi hopi mas progreso y logra bon resultado. E fase di qualificacion aki t’e proceso pa yega ‘2026 Concacaf W Championship’ y despues tambe ‘Mundial Brasil 2027’ y Weganan Olympico 2028 na Los Angeles, incluyendo ‘W Nations League’ y ‘W Gold Cup’ benidero. Mester enfatisa cu e weganan aki no ta wega di fogeo, nan lo mas bien determina unda e ekiponan lo keda den e grupo y ranking cu lo bai hunga un rol p’e qualificacion pa tur e otro torneonan menciona.

–

–

Construyendo pa exito

Casi un decada pasa ainda nos seleccion femenino di Aruba tabata cococha sin rumbo den fasenan di grupo den Caribe y e region di Concacaf, nos tabata contenta nos mes cu siquiera un gol pa saca cara, esey mes tabata un logro pa nos den hopi ocasion, “e participacion tabata conta toch”, esey tabata e mentalidad. Pero, awor no mas; personanan dedica den e curpa organisativo a cuminsa aplica order y sistema, training di coach y lider nan, preparacion fisico y mental di e hoben hungador nan. Un “overhaul” completo a wordo hasi di e sistema p’asina bira un ekipo competitivo cu ‘mentalidad ganador’, Aruba awor ta riba un otro rumbo, diferente cu antes, danki n’e cambionan.

Exito no ta necesariamente bin di biaha, e no ta algo di anochi pa mainta, pero tampoco temporario, e mester ta sostenibel. E fundeshi a wordo traha, e sistema a cuminsa drei. Den e division nan hubenil (U14 y U15) Aruba a cuminsa bira hopi mas competitivo, basta liher, ainda mas cu esey, a hasta alcansa varios final y tambe a gana titulo. Mira kiko un “switch in mentality” por hasi, pero, t’e ‘sistema’ ta locual eventualmente lo trece frutanan pa wordo cosecha y disfruta, p’aso bo por soña cu un gran logro pero pa yega n’esey mester di un plan di accion, un sistema pa hibabo eynan.

–

Seleccion nacional femenino

E seleccion femenino grandi tambe a cuminsa sinti e efecto di e cambio di mentalidad, organisacion y preparacion, hunto cu e hungadornan jong, tur ta parti di e mesun sistema, destina pa logra cosnan mihor, hasta grandi, pero promer cu esey ta importante pa hasi progreso. Awendia tin varios hungadornan di seleccion na diferente club nan na Hulanda y otro paisnan na Europa, incluyendo recientemente; De Graafschap, FC Utrecht, NEC Nijmegen, Ado Den Haag y Club Brugge entre otronan, tur e experiencianan ey (hasta na nivel individual) ta conta a lo largo na benefishi di e ekipo nacional.

Den e ultimo dos añanan e seleccion grandi tambe a logra gana un torneo na Korsou, cu a inclui Korsou mes y Trinidad & Tobago, y no lubida e triple weganan di fogeo na Surnam recientemente. Den casi tur weganan recien a mustra hopi cos bon riba cancha y ora bo ta hasi cosnan bon, cu disciplina, cu dedicacion y motivacion, bo ta crea ‘bon habitonan’, y cosnan mihor ta bai sosode. Tin hopi prospecto, tin talento, tin mas expectativa tambe, e preparacion ta bon, e sistema ta ful implementa, awor ta keda na ‘alma y cuerpo’ y ‘amor pa ekipo’, pa hasi lo demas pa yega mas leu cu nunca.

–

E hungadornan convoca pa forma parti di e seleccion nacional ta:

Portero: Hadassah Kock, Betealie Stamper, Richdienne Croes

Defensa: Dyvienne Henriquez, Genesis Hazel, Joya Tromp, Sofia Mora, Michaella Netto, Jayla Croes, Delilah Croes, Niamh Tromp

Volante: Tarianna Doornkamp, Amy Henao, Izaline Angela, Aisse Gumbs, Soraya Verhoeve, Adannayah Breinburg, Joyce Chen, Denicienne Maduro

Delantero: Bonny Lammers, Vanessa Susanna, Zyana Rogers, Jill Dreischor

–

Aruba lo cuminsa e biahe nobo aki den ‘Concacaf W Qualifiers’ den grupo E hunto cu Panama, Cuba, Saint Kitts & Nevis y Korsou. Den nan prome partido nan lo host Saint Kitts and Nevis na Stadion Guillermo Prospero Trinidad Diabierna awor (28 November, 2025) pa 8pm, sigui despues pa otro partidonan di W Qualifiers den e siguiente cuater lunanan, cu ta inclui partidonan contra Cuba Maart 7 (probablemente na cas), na Panama April 9 y na Korsou April 13, 2026.

–