Un fin di siman di “fiesta di gol” den Division Honor. Un weekend di sorpresa tambe den siman 6, un shock mehor dicho. Dakota ta consolida nan mes den prome lugar, nan ta invicto ainda, Camilo Peña di Dakota cu su di dos “hattrick” di e campeonato. Bubali ta subiendo y e bataya pa puesto seis ta cuminsando.
–
–
SV Deportivo Nacional vs SV Real Koyari
–
Nacional a gana Real Koyari n’un manera facil, ainda a purba bai pa mas pero no a logra, Nacional a hasi nan trabou. Toch por bisa cu Koyari ta mehorando segun e campeonato ta bayendo pero sigur cu no ta bai ta suficiente pa evita bai hunga den “promocion/degradacion”, esta “Liga Plata”. Nacional si ainda ta den contencion pa drenta den “Liga Oro” den e top 6 mihornan riba tabla. Devis Oliveros di Nacional cu un “brace” den e partido aki.
⚽’10 Alejandro Mejia NAC ⚽’21 Devis Oliveros NAC ⚽’50 Jose Gil NAC ⚽’57 Devis Oliveros NAC ⚽’61 William Pardo NAC
🟨’28 Luzardo KOY
–
SV Racing Club Aruba vs SV Estrella
–
Estrella a mehora mash hopi mes for di comienso di e campeonato, un ekipo bon organisa den e anochi aki, a bataya RCA te final den un wega tenso, duro pero sportief, e partido mas atractivo di e weekend aki. RCA mester a traha duro pa bai cu e tres puntonan, pero na final di dia mester bisa cu nan a hasi nan trabou. Estrella toch ta keda den bataya pa clasifica pa Liga Oro, nan ta solamente 3 punto aleha foi River Plate den puesto 6. RCA ta solido den top 4.
⚽’36 Juan Rengifo RCA ⚽’50 Alexon Simmons RCA ⚽’76 Jhon Silva RCA ⚽’80 Naibert Elizabeth EST
🟨’26 Linscheer RCA 🟨’48 Farro RCA 🟨’66 Mayorga EST
–
SV Dakota vs SV Sporting Aruba
–
Dakota a bin y a hasi nan business den e partido aki, likidando Sporting den gran forma. Sporting cu a bin ta subiendo y hungando mihor bala, pero, a topa cu e ekipo cu ta den mihor forma ainda y lider di campeonato te cu awor. Cu e victoria aki Dakota ta sigura matematicamente nan clasificacion pa Liga Oro, pero mi ta sigur cu nan no ta ni bai worry cu e concepto aki, faltando tres fecha mas na lo kier sigui hunga bon bala na un manera consistente. Camilo Peña cu su di dos “hattrick” di e campeonato aki. Sporting ta keto bai den di 5to lugar riba tabla.
⚽’13 Sebastian Montoya DAK ⚽’19 Camilo Peña (P) DAK ⚽’39 Ricky Hodge (P) SPO ⚽’59 Camilo Peña DAK ⚽’75 Camilo Peña DAK
🟨’16 Montes DAK 🟨’18 Antersijn SPO 🟨’20 Robert DAK 🟨’24 Charles SPO 🟨’38 Luidens DAK 🟨’45+1 Paul DAK
–
SV Britannia vs Bubai SC
–
E shock grandi di e siman 6 aki, pero tambe e shock di e campeonato, no solemente debi n’e victoria di Bubali riba e campeon di Aruba, pero tambe debi n’e score final abulta di 5-2. Brayan Morales cu un “brace” pa su ekipo di Bubali. Ta Britannia su prome derota den hopi tempo. Mester bai bek te 11 di Mei, 2024 unda nan a perde pa ultimo biaha den e liga (1-2 vs Estrella). Bubali cu e victoria aki ta awor den contencion pa alcansa playoff “Liga Oro”, nan tin awor 6 punto, un so aleha di River Plate den e puesto 6 riba tabla. Britannia asina mes ta keto bai den puesto 3 cu 11 punto den 6 partido.
–
ASV River Plate vs SV La Fama
–
La Fama a demostra nan forsa den e partido aki, nan tawata paborito pa gana pero e resultado final ta mas cu hopi a pensa, un score final grandi p’e ekipo Savanetero. Asina La Fama ta keda den di dos lugr te cu awor faltando tres fecha mas. River Plate apesar di e resultado, ta keda den e di 6 puesto, kiermen ainda nan ta clasificando pa Liga Oro, pero tin competencia cu Bubali y Sporting p’e puesto ey, co ta birando interesante, bataya pa clasificacion ta cuminsando.
⚽’25 Jose Gonzalez (OG) LAF ⚽’28 Tyrone Boasma LAF ⚽’44 Kenroy Ranger LAF ⚽’55 Delayno Jansen LAF ⚽’56 John-Rick Kelly RIV ⚽’62 Gregory David LAF ⚽’85 Carlos Quandt RIV ⚽’87 Anderson Olaya LAF
🟨’24 Samper RIV 🟨’45+2 Boasma LAF 🟨’48 Ranger LAF
