Aruba lo hunga contra Honduras y Jamaica entre otro,
weganan ta cuminsa diadomingo awor.
–
Weganan corespondiente na ‘grupo D’ lo wordo hunga na Stadion GP Trinidad. Aruba ta den grupo hunto cu Honduras, Jamaica, Guyana y Saint Vincent & the Grenadines. For di e 6 gruponan, en total 28 pais, e ganador di cada grupo hunto cu e dos mihor di dos lugarnan, lo sigui den e qualificacion p’e siguiente rond. Na final ta 4 pais di e region di Concacaf so lo por bai e campeonato mundial na Morocco na october benidero.
–
–
Aruba a cai den un grupo duro cu ta inclui tambe dos ekipo poderoso den nos region man’e Honduras y Jamaica, un reto hopi grandi mes, kiermeen mester di tur sosten di e fanaticada local, e ‘hungador number 12’, ban yega stadion cuminsando e diadomingo aki, ‘Dia di Betico’, pa alenta e hungadornan.
E seleccion aki, di edad te cu 17 anja, ta bou guia tecnico di Head Coach Joally Lake hunto cu Lerjan Caceres y demas elenco, ta un ‘projecto den progreso’ cu a cuminsa algun anja pasa, y a bin ta marca paso den e ultimo temponan cuminsando fei U-15, algun di e hungadornan hoben aki a yega di gana ‘tournooi’ den e regio y tambe a haya mas experiencia hungando c’e seleccion grandi di Aruba recientemente. E ekipo tin entre otro hungadornan na man’e Niamh Tromp, Denicënne Maduro, Zyana Rogers, Adannayah Breinburg y otro nombernan conoci.
Pa resumi; e prome partido di Aruba su “Rising Briyante Girls” lo tuma lugar riba 25 di januari (diadomingo awor) pa 8pm den Stadion Trinidad contra seleccion di Honduras (tur partido di Grupo D lo tuma lugar na dicho stadion). E otro partidonan di e seleccion lo ta contra Jamaica diamars 27, Guyana diahuebs 29, y Saint Vincent & the Grenadines diasabra 31 di januari, tur wega di Aruba ta cuminsa 8pm, yega stadion!
E seleccion di Aruba ta consisti di e siguiente hungadornan:
Keeper: Dylana Veenstra, Tyanne Rafael, Therilaine Ruiz
Defensor: Ashlynne Franken, Dariëlla Leerdam, Niamh Tromp, Aliyah Harms, Caylee-Ann Geerman, Kristeen Brete, Arianny Gomez
Volante: Deniciënne Maduro, Sofia Gois Santos, Liandra Angela, Adannayah Breinburg, Jo-Annie Perez Molina, Jirvianna Kock
Delatero: Kaylee Vlijt, Sienna Elings, Zyana Rogers, Natuishka Kwidama, Yentl Van Kats
–
Seleccion di Aruba completo cu staff y techniconan – foto cortesia AVB
Hopi exito na team Aruba.
