Nos muchanan a bataya un ekipo superior pa mas cu 90 minuut largo
–
Adannayah Breinburg (10) a anota e unico gol di Aruba – foto cortesia di AVB
–
Den un wega hopi duro, Aruba U-17 a enfrenta Honduras U-17 pa prome biaha den nan historia. Nan a bataya Honduras (un pais di casi 10 miyon habitante) cu tur cu tin, y apesar c’e ekipo “catracha” tabata faborito pa gana e partido aki, ban pon’e cos den contexto; nos “Rising Briyante Girls” tabata empata cu e poderoso ekipo centro-americano te na minuut 71, apesar cu nan a ataka nos hopi, cu hopi yegada y hopi tironan di peliger, for di prome tempo caba, nos muchanan a wanta duro y a defende hopi bon mes.
Helaas na minuut 71 e atakante di Honduras, e number 10, Alexandra Merriam, a habri marcacion. For di p’afor di area penal e ta los un tiro cu su pia drechi pa bati portero Dylana Veenstra den e parti mei mei ariba di e porteria p’e 1-0, un assist di Allisson Suazo. Mester menciona cu Veenstra y e defensa a rechasa tur sorto di atake pa tene su porteria limpi te n’e punto ey, shete (7) tiro salba, hopi notabel mes.
–
Portero di Aruba, Dylana Veenstra – foto cortesia di AVB
–
Na minuut 79 tawata Suazo mes su turno pa anota, un gol for di un cruce di tiro di skina pa medio di su pia robes, drentando na banda robes di e gol. E hungador aki tawatin un total di seis tiro riba gol e anochi aki, e tawata hopi activo pa su seleccion, Suazo y Merriam ta dos di e shete hungadornan di Honduras cu ta hunga futbol na USA. Despues di e gol aki Aruba ta cuminsa sali mas den atake, man’e nos sa bisa, ‘pusha dilanti’, esey ta di mes, pa busca e gol di corta bentaha. Den un di e momentonan aki, na minuut 87, Honduras ta haya espacio y Merriam ta bolbe anota pa su di dos gol di e partido, un gol cu pia robes foi p’afor di e box cu ta bai cai den e banda drechi di e tres palonan p’e 3-0 na fabor di Honduras.
Asina mes Aruba no a “give-up”, nan a sigui hunga bala, buscando na logra si kiera un gol pa nan esfuerso grandi, kedando sin pia, y nan a logr’e! den tempo di descuento, na minuut 90+2. Un gol di honor di Adannayah Breinburg, for di tiro liber cu su pia drechi cu a dal den net na halto na banda robes p’e 1-3. Un gol pa celebra, un gol p’e trabou duro di e anochi aki, cu apesar cu no a bay na nos fabor, e tabata sin duda un gran experiencia, demostrando cu nos por competi awor, nos ta bringa te final, apesar cu e contrincante tabata superior na nos, no tin duda. Toch e resultado di 1-3 tin un smaak di “nos muchanan a duna tur cu tin”, nos lo bai crece di e golpinan aki, tin biaha bo por gana den perdemento.
–
Seleccion di Aruba U-17 – Di robes pa drechi – para: Leerdam, Franken, Rogers, Breinburg, Angela, Veenstra, dilanti: Maduro, Perez-Molina, Brete, Gois, Tromp (capitan) – foto cortesia di AVB
–
Resumen:
–
⚽’71 Alexandra Merriam HON ⚽’79 Allisson Suazo HON ⚽’87 Alexandra Merriam HON ⚽’90+2 Adannayah Breinbrug ARU
🟨’ 29 Sanchez HON
–
P’a Aruba a cuminsa: Veenstra, Franken, Leerdam, Tromp (c), Brete, Perez-Molina, Maduro, Angela, Breinburg, Gois-Santos y Rogers. Di suplente a drenta den wega: Geerman, Vlijt, Harms y Rafael. Demas suplentenan: Elings, Gomez, Kock, Kwidama, Ruiz, van Kats.
Aruba ta bolbe hunga Diamars awor contra Jamaica na Stadion Trinidad pa 8pm.
Nota: den e prome partido di Grupo D awe tardi, Jamaica y Guyana a keda empata 1-1. Guyana a bai ariba na minuut 76 pa medio di un gol di Alexauria Chasles. Jamaica ta empata na minuut 85, gol di Nycolette Prendegas.
