Un victoria cu ta indica ta na unda e nivel di e seleccion aki ta realmente
–
Den nan ultimo partido di e torneo qualificacion pa Copa Mundial Femenino U-17 2026, Aruba ta demostra cu apesar di a sali cortico den grupo D contra e grandinan di Concacaf, nos por bisa cu nan ta n’un nivel mas halto awor, esey a keda demostra contra Saint Vincent. Un cinco anja pasa ney, “kizas” nos por a logra un victoria di chiripa contra un ekipo man’e Saint Vincent, y esey hungando na cas, nos tabata nan pareu e tempo ey. Awor sin pia, desgasta, despues di a hunga 4 wega den 6 dia, nos ta gana nan convincentemente, y por tabata pa mas ainda. Por lo general tin mas positivo cu negativo pa relata, esey ta conta tambe pa henter e torneo.
Den e wega aki, Aruba a anota e prome gol, ni un minuut drechi di wega; Zyana Rogers for di un pase di Adannayah Breinburg, ta hay’e bala den area penal di Saint Vincent pa fusila portero Hyeisha Thomas. Un gol cu su pia robes cu a crusa bai te na banda drechi di e gol p’e 1-0 pa Aruba.
Siguientemente Aruba ta bai den un “fast break mode”, nan ta intercepta basta bala den medio campo te cu 3/4 di cancha n’un manera efectivo, e ‘wega di transicion’ a funcciona. E wega efectivo aki tabata hopi debi na Denicienne Maduro, Adannayah Breinburg mes tambe y e elenco den volante, sofocando Saint Vincent, cu no tabatin casi nada di yegada den e area penal di Aruba. Un solo biaha den e prome tempo nan a penetra den e zona di peliger di Aruba, un tiro manso riba gol, nan no a ni penetra mucho den teritorio (half) Arubano debi n’e dominio di nos muchanan den medio campo.
–
Adannayah Breinburg den accion contra Saint Vincent, 2 gol y 1 assist den e wega – Foto cortesia AVB
–
E di dos gol di Aruba a yega na minuut 11 caba, un tiro liber p’afor di area penal di Saint Vincent, cobra (assist) pa Niamh Tromp net precies pa Adannayah Breinburg den area penal, cu na su turno a deposita e bala den net mei mei di e gol cu su pia drechi. 2-0 pa Aruba.
E di tres gol di Aruba a drenta na minuut 22 pa medio di Kaylee Vlijt, cu a traha hopi duro riba e hala banda drechi, pero e gol mes a drenta ora cu Vlijt ta pon’e su mes na banda robes y ta haya e bala den area penal, cu su pia robes e ta scop e bal mei mei den net. 3-0 pa Aruba. Halftime.
Den di dos tempo Aruba kier a bai pa mas gol, nan a hasta “shuffle” e formato, poniendo 5 den atake (man’e un 3-2-5), y apesar cu Aruba a retene e bala dilanti den mas ocasion, ironicamente den un “bal verlies” Saint Vincent ta bai den un contra golpi y ta gana un tiro liber (un poco dudoso si) na rand di area penal di Aruba, eynan e unico gol di e “Lady Heat” ta yega tambe na minuut 56. Gol di tiro liber di Amunique Edwards cu ta bati portero Tyanne Rafael, mei mei na halto, p’e 1-3.
–
Ekipo di Aruba U-17 “Rising Briyante Girls” vs Saint Vincent U-17: R-D atras – Vlijt, Rogers, Breinburg, Angela, Leerdam, Rafael – Dilanti – Maduro, Perez-Molina, Brete, Harms, Tromp (Capitan) – Foto cortesia AVB
–
Aruba ta sigui domina, pero Saint Vincent cu mas intention awor, algun yegada, pero sin mucho tiro di peliger. E di cuater gol di Aruba ta yega na minuut 68 pa medio di e hungador Liandra Angela, cu tambe tabatin un bon partido, asisti pa Adannayah Breinburg for di un tiro liber, pon’i perfectamente den area penal, unda Angela ta cabesa abou na banda drechi di e porteria di Saint Vincent. 4-1 pa Aruba.
E partido a haya un tono mas fisico den di dos tempo, Saint Vincent a cuminsa impone mas “stootjes” den e wega tratando di frena e dominio di Aruba, pero toch envano. Varios carchi geel a cai, cuater pa Saint Vincent y dos pa Aruba.
E ultimo gol di Aruba a cai na minuut 82, cuminsando cu un tiro liber (y otro assist mas) di capitan Niamh Tromp, net den direccion di Zyana Rogers den area penal, unda e ta domina y scop e bala cu su pia robes den e fondo di net na banda drechi pa su di dos gol di e partido. 5-1 pa Aruba.
Asina mes e partido a termina, victoria grandi pa Aruba U-17, resultado final 5-1.
–
Zyana Rogers (9) cu e bala, cu dos gol y Kaylee Vlijt (12) cu tambe a anota den e wega di Aruba contra Saint Vincent – Foto cortesia AVB
–
Algun mencion special den e partido aki:
Adannayah Breinburg t’un hopi bon hungador, esey a keda demonstra awenochi den e partido aki y e torneo, e mihor di e seleccion di Aruba sin duda, casi tur hugada grandi a pasa via di dje, e por ataka y anota, distribui y tambe recupera bala, e por defende bon ora tin mester, varios biaha por a wak’e core bin bek te patras pa yuda defende un contra-golpi. 1 gol y 2 assist den e wega aki.
Niamh Tromp, e capitan di Aruba , man’e semper cu gran mentalidad y pasion cu ta “top-notch”, cu dos assist den e wega aki, bon trabou den defensa hunto cu Dariella Leerdam, cu tambe tabatin un partido sublime defendiendo.
Zyana Rogers tambe t’un talento grandi. Despues cu el a anota e prome gol di Aruba, ni un minuut drech di wega, mi a wak Zyana basta biaha na suela, di baina e por a cana, e tabata golpea y bati, cu man na zij den hopi ocasion, pero el a sorprendemi, p’aso el a sigui bataya, y tabata un “nachtmerie” pa Saint Vincent su defensa, el a hasta score su di dos gol hopi despues, laat den di dos tempo, y asina mes el a sigui purba y lucha te final. 2 gol den e wega aki pa Rogers.
Mas notanan :
Dylana Veenstra no a para den gol awenochi, el a traha hopi caba den e tres prome partidonan, e tabatin un total di 23 tiro salba den tres partido, esey ta un promedio di casi 8 tiro salba pa partido, el a tene su ekipo den wega, sin duda.
Hopi sa cu un di e tres porteronan di Aruba su seleccion U-17, Therilaine Ruiz, ta jiu di Theric Ruiz un baluarte di futbol Arubano. Pero hopi no sa c’un otro integrante clave di e seleccion femenino U-17, Jo-Annie Perez-Molina, hungador number 8, ta jiu di Albert “Killer” Francis, cu den pasado a yega di sali e top goleador di Division di Honor, un hungador importante cu a sali campeon cu tres diferente club na Aruba (a la Clarence Seedorf). Tabata un placer pa mir’e ta sostene su jiu muhe den e wega aki contra Saint Vincent.
–
Recap:
⚽’1 Zyana Rogers ARU ⚽’11 Adannayah Breinburg ARU ⚽’22 Kaylee Vlijt ARU ⚽’56 Amunique Edwards VIN ⚽’68 Liandra Angela ARU ⚽’82 Zyana Rogers ARU
🟨’17 Lewis VIN 🟨’36 Slater VIN 🟨’59 James VIN 🟨’59 Rogers ARU 🟨’67 Hazel VIN 🟨’70 Angela ARU
