Un partido importante y hasta un situacion di “must win” pa Aruba den wega di qualificacion pa Mundail 2027, nos seleccion femenino ta perde cu diferencia minimo cu Cuba den un partido cu nan a domina pa mayoria di e tempo di e wega, ta solamente cu e gol nunca a drenta pa nan.
–
Wega duro – Aruba vs Cuba – Breinburg, Doornkamp y Hazel di Aruba batayando contra Mena di Cuba – foto cortesia DAC
–
Bida no ta deporte, pero deporte por sinja nos hopi di bida. Nos por sinja con pa sa di gana y tambe sinja con pa sa di perde. Tin cu ta sinja e cosnan ey hungando deporte, otronan ta sinja crece den bida debi na contratemponan (dificultadnan), tur esey ta forma caracter, tur esey ta parti di crecemento den bida.
Rib’e mesun fecha mas trempan den e dia aki, e ekipo di baseball di reino hulandes a logra un hazaña den un torneo mundial, ganando nan wega contra e ekipo di Nicaragua den nan ultimo suspiro, despues cu Nicaragua a hunga mihor bala cu nan pa gran mayoria di e tempo y kizas hasta tabata merece e victoria, pero bida no scirbi asina, deporte tampoco.
–
Seleccion di Aruba – robes pa drechi – atras: Kock, Netto, Susanna, Hazel, Doornkamp, Verhoeve (c) – dilanti : Gumbs, Tromp, Breinburg, Lammers, Henriquez – Foto cortesia DAC
–
E seleccion femenino di futbol a bin di gana Saint Kitts den nan ultimo partido akinan na Aruba den un gran partido. Nan a mehora asina hopi cu awendia ya nos ta exigi mas di nan, esey ta algo cu ta bin cu exito. Den e wega aki, nan ultimo na cas den eliminatorio pa mundial, lo tabata preferibel pa gana di Cuba, cu a caba di bin di un victoria di 3-0 contra Corsou e siman previo, y tur cos tabata parc’e, di berdad, cu nos tabatin tur chens pa gana nan akinan na cas, pa 80% di e partido aki, sigur esey tabata e posibilidad.
Den e prome tempo Aruba a sali ‘duro duro’ caba, nan a domina den posesion, 70% vs 30% di Cuba, nan tabata superior den tur departamento ofensivo, yegada den area penal, tiro di skina. Cuba a mas bien hunga un wega di intercepta y bay den contra golpi. Cuba tambe a hunga un wega di pressing y haci cos dificil p’a nos ekipo, nan a dal mas, y p’esey a haya tres carchi geel den e wega, un strategia pa desequilibra nos, y el a funcciona, mas ainda den e di dos tempo, unda na un cierto punto nos no tabata sa mas kiko pa hasi pa anota, apesar cu Adannayah Breinburg a sa di avansa e bala hopi mes, creando chens pa su ekipo, mescos cu Michaela Neto cu a hunga un bon partido den defensa y a sa di bay den atake tambe den varios ocasion.
–
Seleccion di Cuba – robes pa drechi – atras: Martinez, Acosta, Wanton, Rodriguez, Arocha, Mena (c) – dilanti: Bahamonde, Valdes, Lee, Aguilar, Nunez – Foto cortesia DAC
–
Aruba tabatin 10 tiro riba gol di cual solamente 2 tabata “on target”, pero e statistiek cu ta interesante ta cu 7 di e shotnan ey tabata den box! hopi oportunidad serca di gol contrario perdi realmente, nos calidad den area penal no tabata skerpi, pero e positivo ta cu; yegada tabatin.
E variante den e di dos tempo ta cu Cuba a cuminsa gana (intercepta) e bala hopi mas den medio campo, esey ta indicativo den e hecho cu nan tabatin 14 intercepcion contra 6 so di Aruba, kiermen nan a domina den ‘recuperacion di bala’, vooral den di dos tempo, apesar cu ta 1 tiro so nan tabatin for di den area penal mes, contra 7 di Aruba, mayoria di nan tironan tabata foi p’afor di area penal.
–
Michaela Netto, defensa di Aruba cu un bon rendimento den e partido, akinan el a bai laga Elianne Valdez di Cuba – Foto cortesia DAC
–
Soraya Verhoeve, e capitan di Aruba, un biaha esun cu mas trabou den medio campo, a hay’e cu man yen, apesar cu Breinburg a dun’e bon ayudo, bayendo dilanti, pero kizas rib’e anochi aki, Bonny Lammers lo por tabata hungando un poco dimas retrasa, en bes di den un rol mas adelanta, kizas hasta den “center forward”, cu lo por a funciona mihor e anochi aki? ta algo pa contempla.
Asina tambe e gol di (poco) suerte realmente a sosode pa Cuba. E gol na minuut 62 a mustra mas intencional en bibo, pero e hungador di Cuba, Nahomi Aguilar, a lansa un bala for di leu, purbando su suerte, un tiro no mucho duro, na banda drechi di e area penal di Aruba cu a haya e portero Hadassah Kock un poco mal para y e bala cu ayudo di e biento fuerte, a man’e flota y pasa riba su cabes bay den net p’e gol di victoria Cubano.
–
Adannayah Breinburg, volante di Aruba ta purba bai laga Katheryn Rodriguez di Cuba – Foto cortesia DAC
–
Despues di e gol, e tempo a bira e rival mas grandi di Aruba, e muchanan local a man’e bira un poco ancioso, Cuba a intercepta e bala un poco mas de la cuenta tambe, previniendo Aruba di lansa den atake na un manera mas coordina, cu mihor yegada den box.
Asina e partido a termina tambe, despues di un ultimo chens pa anota, un cabes di portero Hadassah Kock mes cu a bay net na banda robes di e porteria Cubano. Derota y banjo di awa friew pa Aruba, e esfuerso di 110% no a duna fruta e anochi aki, lastima, pero e muchanan lo sinja for di esaki, nan lo sinja cu efectividad semper ta gana cantidad, e anochi aki Cuba cu poco tabata mas efectivo na final, p’aso nan si a logra pon’e e bala den net.
–
Nahomy Aguilar ta anota e gol di victoria di Cuba na minuut 62 – Foto cortesia DAC
–
Siguientemente Aruba lo biaha pa Panama y despues pa Corsou na April benidero pa nan ultimo dos weganan di cualificacion pa Mundial 2027.
–
Den resumen:
⚽’62 Nahomy Aguilar CUB
🟨’44 Acosta CUB 🟨’72 Aguilar CUB 🟨’78 Hechavarria CUB 🟨’90+1 Breinburg ARU
–
