–
Un categorico victoria di 4-1 riba Liechtenstein ta seya e campeonato p’e seleccion di Aruba. T’a prome biaha cu Aruba ta hunga y tambe keda victorioso contra un ekipo Europeo.
–
Semper tin un prome biaha den tur cos. Un prome torneo inter-continental, unda seleccion nan di diferente continente ta enfrenta otro den un torneo cortico cu ta yama FIFA Series. Den e grupo B aki cu a hunga nan wega na Kigali, Rwanda, tambe a participa Tanzania representando Africa, Macau, representando Asia, Liechtenstein, representando Europa, y Aruba, representando e region di Concacaf (Noord Amerika, Centro Amerika y Caribe). E prome biaha cu a hunga riba suela africano, e prome biaha cu a enfrenta un seleccion europeo tambe.
Den e prome partido di e cuadrangular, Aruba a derota Macao convincentemente cu anotacion di 4-1, esey a duna nan e derecho di enfrenta e ganador di e otro partido, unda Liechtenstein a sorprende Tanzania, e ekipo mas halto den ranking, algun dia atras ganando 1-0.
E partido final a wordo hunga den stadion Kigali Pele, stadion nombra na honor di e brasileno Edson Arantes do Nacimento, mihor conoci como Pele, e leyenda di futbol mundial.
–
–
Aruba a bay ariba na minuut 19 c’un gol di Jaybrien Romano, asisti pa Gello Robertha. Aruba 1 – 0 Liechtenstein.
Aruba cu mas posesion di bala y tambe mas tironan riba gol a duna fruta trempan den e partido. E di dos gol di Aruba a yega na minuut 25 unda cu Gello Robertha mes, hungador di VV Ijsselmeervogels den tweede divisie na Hulanda, ta aumenta e bentaha di Aruba na 2-0.
Haltime a bay aden cu Aruba cu un bon bentaha di 2-0.
–
Gello Robertha di Aruba cu un bon partido contra Liechtenstein – foto cortesia AVB
–
Den di dos tempo na minuut 52, Liechtenstein ta corta bentaha cu gol di Emanuel Zund, asisti pa Fabio Notaro. Aruba 2 – 1 Liechtenstein.
C’un minimo bentaha den e partido, Aruba ta haya un shock ora cu Rovien Ostiana ta haya un di dos carchi geel y mester a bandona e partido na minuut 61, Aruba cu dies hungador pa trata na wanta e bentaha.
–
Rainey Breinburg ta celebra su gol spectacular hunto cu Gello Robertha na minuut 69, lok’e a haci e wega 3-1 p’a Aruba – foto cortesia AVB
–
Pero den tur esey mas bien Aruba ta anota nan di tres gol pa amplia bentaha. Gol oportuno, un “sambombaso” di Rainey Breinburg di apenas 20 anja na minuut 69. Beinburg a drenta net prome cu halftime pa Aruba. E gol di distancia a amplia bentaha di Aruba na 3-1.
E cambionan di Aruba despues di e carchi cora di Ostiana a duna bon efecto. Liechtenstein a purba pero no a logra. Aruba a defende bon tambe y pa colmo na minuut 90+4 ta haya un auto-gol di e defensor central di Liechtenstein, Jens Hofer, pero por wel di tabata un gol di e hungador Arubiano mes, Conner van Kilsdonk si el a push’e e bala un tiki mas duro rib’e linea di gol, ‘enfin’, esey a haci e marcacion 4-1 na fabor di nos seleccion y tambe e resultado final. Gran partido di Aruba.
–
Jaybrien Romano ricibiendo su premio como MVP den e torneo – foto cortesia AVB
–
Aruba ta gana e trofeo den e cuadrangular aki, algo pa celebra di berdad, gana ta gana, campeon riba suelo africano. Dos victoria sigui di 4-1 pa keda cu e titulo. Aruba ta rib’un bon racha, nan a perde solamente un biaha so den nan ultimo shete weganan desde cu nan a gana Cambodia 2-1 na Phnom Penh na Maart anja pasa.
Jaybrien Romano, rechtsback di Aruba, ta keda escohi como e mihor hungador den e cuadrangular na Rwanda.
Pabien na head-coach Marvic Bermudez, henter staff y e seleccion di Aruba.
–
Seleccion di Aruba – ekipo titular den e final – Lentink (gk), Nedd, Martis (c), Romano, Bennet, Poulina, Ostiana, Curiel, Robertha, Fermina, Vandepitte. Otronan – Breinburg, Luydens, van Kilsdonk, Paul, Senchi, Eisden, Toussaint, Baly, Jimenez, Kruydenhof, Leito, Molina – foto cortesia AVB
–
