La Fama to meet Dakota in the final, yet not on Betico day but on February 13
Full report in Papiamento with box-score
–
La Fama y Dakota ta den final di Copa Betico 2026.
E club Savanetero cu ta den un bon campanja den Division di Honor y awor ta den final di Copa Betico 2026 tambe. Den nan partido di semi-final nan a despacha Caiquetio n’un manera convincente cu anotacion di 4-1, pero toch mester a traha duro p’e victoria. Un partido cu a mustra un Caiquetio, ekipo di Division Uno, cu a duna bataya te final, e indjan nan di Paradera a destaca hopi den e torneo di e anja aki, asina bon cu nos a haya nos ta menciona anteriormente cu di berdad nan por wel di ta hungando y dunando competencia den e division mas halto e anja aki.
La Fama a pika dilanti, pero te na minuut 42 pa medio di un tiro penal cu Gregory David no a basila pa pon’e den net. Asina mes halftime a bai aden cu un diferencia minimo. Den di dos tempo ta unda La Fama a impon’e nan ritmo y a cuminsa anota e golnan cu a duna nan e victoria den e partido. Na minuut 66 Anthony Walsh, e capitan di e “speransa berde” a anota pa aumenta bentaha na 2-0. Na minuut 75 ta Yorwen Bermudez su turno pa anota pa hasi e wega 3-0. Caiquetio asina ta logra subi riba “scoreboard” cu un gol di Mario Polanco na minuut 84. Tinadio Makanzu (’90+2) cu ta un di e mihor hungadornan den e campeonato actual ta pon’e “broche de oro” pa hasi e partido 4-1 na fabor di La Fama.
La Fama 4 – 1 Caiquetio
⚽’42 Gregory David (LAF) (pk) ⚽’66 Anthony Walsh (LAF) ⚽’75 Yorven Bermudez (LAF) ⚽’84 Mario Polanco (CAI) ⚽’90+2 Tinadio Makanzu (LAF)
🟨’ 24 Maduro (LAF) 🟨’71 Laurence (CAI)
–
Bubali, ‘sin lugar a duda’ ta e sensacion di e campeonato di DH (Division di Honor) e anja aki, subiendo foi Division Uno, a overhaul nan ekipo bou guia di coach Jaime Carasquilla y ta compitiendo pa clasifica pa Liga Oro. Awor den Copa Betico 2026 nan a demostra atrobe cu nan no ta di accident, eliminando Britannia den un partido hopi duro mes den kwart final y awor a bin topa cu Dakota den semis. Dakota ta inbatibel ainda den e liga y awor den e copa ta demostra cu nan ta sigui e “top dog” e anja aki den futbol di Aruba.
E Dakoteronan a bin pa hasi nan “business” y apesar cu e prome kwart di e partido nan mester a wanta cu hopi pasenshi debi nan un pressing halto y descumunal di Bubali, algo cu ni Dakota y hopi fanaticonan a spera, pero el a hasi efecto trempan, pero Dakota tabata sa di haya un manera pa contra aresta e strategia aki di Bubali. Un “counter” relampago riba e flank drechi a resulta den un cruce precies di Juan Camilo Cervantes (2 assist den wega) pa Daniel Briceño cu a pon’e e bala den net pa habri marcacion na minuut 15, asina Dakota a kibra e presion y haya un manera pa cambia e wega. Despues Rolf Derisca ta hasi e wega 2-0 na ’22. Bubali ta logra bin bek den wega toch, na minuut 35, Antonio Fawcett, cu ta bek na su nivel halto atrobe, den un tremendo maniobra ta anota e gol p’e 1-2. Sebastian Montoya ta anota na ’42 pa medio di penalti p’e 3-1. Despues di haltime na ’62, Fawcett atrobe cu su di dos gol p’e 2-3, wega preta awor. Pero, Rosto Desir di Dakota, riba un nivel halto e wega aki, na ’68, c’un fabuloso gol ta hasi e wega 4-2 y Over Garcia (’73) cu su prome “touch” despues c’e la caba di drenta den wega, ta anota cu un golazo p’e 5-2 y score final. Bubali nunca no a baha cabes pero ta Dakota ta bai final.
Dakota 5 – 2 Bubali
⚽’15 Daniel Briceño (DAK) ⚽’22 Rolf Derisca (DAK) ⚽’35 Antonio Fawcett (BUB) ⚽’42 Sebastian Montoya (DAK) ⚽’62 Antonio Fawcett (BUB) ⚽’68 Rosto Desir (DAK) ⚽’73 Over Garcia (DAK)
🟨’85 Hurtado (BUB)
–
E gran final La Fama vs Dakota p’a Copa Betico 2026 lo ta dia 13 Februari.
Nota final: palabranan di condolencia y forsa p’a Jonathan y Gregory Lake, head coach y asistente di SV Dakota cu perdida di na kerido tata.
