La Fama lo enfrenta Dakota den e gran final, pero no riba dia di Betico sino 13 di Februari benidero
–
La Fama y Dakota ta den final di Copa Betico 2026, pero circumstancianan di scheduling di torneo internacional U-17 na Stadion Trinidad cu ta inclui nos seleccion nacional tambe, a pon’e cu e final lo wordo hunga rib’un otro fecha, cu no ta dia di Betico.
–
Semi-final 1 – La Fama vs Caiquetio
E club Savanetero cu ta den un bon campanja den Division di Honor y awor ta den final di Copa Betico 2026 tambe. Den nan partido di semi-final nan a spacha Caiquetio n’un manera convincente cu anotacion di 4-1, pero toch mester a traha duro p’e victoria. Un partido cu a mustra un Caiquetio, ekipo di Division Uno, batayador te final, nan nunca a give-up, e indjan nan di Paradera a destaca hopi den e torneo di e anja aki, asina bon cu nos a haya nos ta menciona anteriormente cu di berdad nan por wel di ta hungando y dunando competencia den e division mas halto.
La Fama a pika dilanti, pero te na minuut 42, pa medio di un tiro penal cu Gregory David no a basila pa pon’e den net. Asina mes halftime a bai aden cu un diferencia minimo. Den di dos tempo ta unda La Fama a impon’e nan ritmo y a cuminsa anota e golnan cu a duna nan e victoria den e partido. Na minuut 66 Anthony Walsh, e capitan di e “speransa berde” a anota pa aumenta bentaha na 2-0. Na minuut 75 ta Yorwen Bermudez su turno pa anota pa hasi e wega 3-0. Caiquetio toch ta logra subi riba “scoreboard” cu un gol di Mario Polanco na minuut 84. Tinadio Makanzu (’90+2) cu ta un di e mihor hungadornan den e campeonato actual, ta pon’e “broche de oro” pa duna La Fama e victoria.
Score final: La Fama 4 – 1 Caiquetio
⚽’42 Gregory David (LAF) (pk) ⚽’66 Anthony Walsh (LAF) ⚽’75 Yorven Bermudez (LAF) ⚽’84 Mario Polanco (CAI) ⚽’90+2 Tinadio Makanzu (LAF)
🟨’ 24 Maduro (LAF) 🟨’71 Laurence (CAI)
Potret di archivo FutbolAruba/DAC
–
Semi-final 2: Bubali vs Dakota
Bubali, ‘sin lugar a duda’ t’e sensacion di e campeonato di DH (Division di Honor) e anja aki, subiendo foi Division Uno, a overhaul nan ekipo bou guia di coach Jaime Carasquilla y ta compitiendo pa clasifica pa Liga Oro. Awor den Copa Betico 2026 nan a demostra atrobe cu nan no ta di accident, eliminando Britannia den un partido hopi duro mes den kwart-final y awor a bin topa cu Dakota den semis. Dakota ta inbatibel ainda den e liga y awor den e copa ta demostra cu nan ta sigui t’e “top dog” e anja aki den futbol di Aruba.
E Dakoteronan a bin pa hasi nan “business” y apesar cu e prome kwart di e partido nan mester a wanta duro cu hopi pasenshi debi n’un pressing halto y descumunal di Bubali, algo cu Dakota y hopi no a spera, e strategia a hasi algun efecto trempan, pero Bubali no a probecha, Dakota a sa di haya un manera pa contra-arest’e. Un “counter” relampago riba e flank drechi a resulta den un cruce precies di Juan Camilo Cervantes (cu 2 assist den e wega) pa Daniel Briceño cu a pon’e e bala den net pa habri marcacion na ’15. Dakota a kibra e presion y a cambi’e wega. Despues Rolf Derisca ta hasi e wega 2-0 na ’22. Bubali ta logra bin bek den wega toch, na minuut 35, Antonio Fawcett, cu ta bek na su nivel halto, den un tremendo maniobra ta anota e gol p’e 1-2. Sebastian Montoya ta anota na ’42 pa medio di penalti p’e 3-1. Despues di haltime na ’62, Fawcett atrobe cu su di dos gol p’e 2-3, wega preta awor. Pero, Rosto Desir di Dakota, riba un nivel halto den e wega aki, na ’68, c’un fabuloso gol, ta hasi e wega 4-2 y Over Garcia na ’73, cu su ‘prome touch’ despues c’e a caba di drenta den wega, ta anota un golazo p’e 5-2 y score final. Bubali nunca a baha cabes pero ta Dakota ta bai final atrobe.
Score final: Dakota 5 – 2 Bubali
⚽’15 Daniel Briceño (DAK) ⚽’22 Rolf Derisca (DAK) ⚽’35 Antonio Fawcett (BUB) ⚽’42 Sebastian Montoya (DAK) ⚽’62 Antonio Fawcett (BUB) ⚽’68 Rosto Desir (DAK) ⚽’73 Over Garcia (DAK)
🟨’85 Hurtado (BUB)
Potret di archivo FutbolAruba/DAC
–
E gran final La Fama vs Dakota p’a Copa Betico 2026 lo ta dia 13 Februari.
Nota final: palabranan di condolencia y forsa p’a Jonathan y Gregory Lake, head coach y asistente di SV Dakota cu perdida di na kerido tata Glenroy, RIP.
