Concacaf y UEFA a cuminsa combersacion pa uni nan dos Nations League den un solo torneo, posiblemente for di 2028. Segun The Guardian y ESPN, e plannan ta na un fase inicial, pero e dos federacionnan ta mas cerca otro despues di e crisis rond di presidente di FIFA Gianni Infantino y su plan (cual a fracasa) pa bende 20% di e Copa Mundial na inversionistanan.

E idea ta pa combina e dos torneonan den un formato di division, mescos cu e Nations Leaguenan actual. Den e nivel mas halto, paisnan grandi di Europa manera Spaña, Francia, Inglatera y Alemania lo por hunga contra Merca, Mexico y Canada. Pa UEFA, e interes ta financiero pa asina haya e mercado di Norte Americano despues di e exitoso Copa Mundial 2026. Pa Concacaf, e bentaha ta wega di mas calidad contra paisnan Europeo. Ainda no tin nada dicidí, y e torneo lo no cuminsa prome cu 2028, como cu e ciclo actual di Nations League di Concacaf ta cla pa cuminsa.

Aruba ta miembro di Concacaf desde 1986 y ta hunga den liga C di Concacaf Nations League. Un torneo hunto cu UEFA lo probablemente pone Aruba hunga contra paisnan chikito di Europeo, no e potencialnan grandi. Na maart ultimo Aruba a topa Liechtenstein cu ta miembro di UEFA den final di FIFA Series 2026 unda cu a gana cu score di 4-1 pa asina titula campeon na Rwanda.Esaki por trece mas wega contra paisnan desconoci, mas exposicion pa nos hungadonan y coach y kisas mas fondo pa desaroyo nos futbol local algo cu Concacaf y UEFA caba ta trahando riba dje via un acuerdo di cooperacion firma e aña aki. Pero e detayenan financiero y con esaki lo yega na federashonnan manera Aruba su AVB, ta ainda desconoci. Pa awor, e torneo ta un posibilidad, no un echo. Aruba, mescos cu hopi otro pais chikito, ta warda pa mira con e proyekto aki ta desaroya.