–
Nos seleccion a logra contene Jamaica, pero te n’un cierto punto, dos di nan golnan a bin n’e ultimo secondenan di cada half.
–
–
Un partido unda cu Aruba a bin cu un strategia di wega cu a sa di contene Jamaica, n’un manera di bisa, pa tene nos muchanan den e wega. E marcador a keda 0-0 te cu 1 minuut prome cu halftime.
Mientras cu Aruba a traba e wega di Jamaica pa un gran parti di e prome tempo, mester bisa cu Jamaica tabatin algun yegada so den e zona di peliger di Aruba, basta tiro foi area penal, pero cu solamente un (1) tiro di peliger, e wega di posesion n’e momento ey prome cu e gol, tabata 58% pa Jamaica contra 42% di Aruba.
P’a ora cu e prome gol a cai na minuut 45+5, Jamaica a cuminsa gana mas bala den medio campo, mientras cu prome Aruba tabata igual-igual cu Jamaica den e bataya p’e medio-campo, Aruba su wega tabata pa traba y intercepta Jamaica den medio campo y nan a logra esey 5 biaha contra solamente 2 di Jamaica. Finalmente e gol a bini toch ora cu Kelvin Brown a haya e bala den area penal y a pon’e a na banda robes di e portero di Aruba Ashton Cathalina p’e 0-1, un assist di su compañero Jahmarie Nolan. 1-0 pa Jamaica.
Despues di halftime Aruba no tabata mescos mas, e gol a desinfla nan (un gol net prome cu halftime semper sa hasi esey), Jamaica a cuminsa avansa y gana mas tereno cu mas yegada. Toch asina mes apesar di e dominio, a tuma hopi tempo p’e di dos gol, net ora cu Aruba a cuminsa sali mas pa busca e empate, net despues di varios yegada y tironan di Aruba, incluyendo esun di Lukas Beyer na minuut 78, den nobenta unda cu portero White di Jamaica a hasi un salbada spectacular. Que hubo si e bala ey a drenta? e lo a nifica empate na 1-1, y sigur un segundo aire pa Aruba, cualkier cos por a pasa, pero helaas no tabata asina.
Cu mas avanse di Aruba, Jamaica a cuminsa haya “ruimte” tambe pa lansa mas den zona di peliger di Aruba. Asina e di dos gol a yega, pa medio di Justin Hayles na minuut 82. 2-0 pa Jamaica.
Aruba a sigui purba pero tempo tambe tabata contra nan awor. Den tur esey ta Jamaica a bolbe lansa den contra golpi y a pon’e e stokada final den tempo di descuento na minuut 90+4, net un minuut prome cu e pitaso final. Gol di Jahmarie Nolan p’e di tres gol di Jamaica.
Score final Jamaica 3 – 0 Aruba
Recap:
–
⚽45+5′ Kelvin Brown JAM ⚽82′ Justin Hayles JAM ⚽90+4′ Jahmarie Nolan JAM
🟨61′ Beyer ARU 🟨62′ Kelly JAM
–
Diadomingo 4pm Aruba lo hunga contra Canada. Den e otro resultado di grupo G, Canada a gana Cayman Island cu anotacion di 3-0 tambe.
