Kiko por spera e anja aki? tin hopi expectativa
Division di Honor ta bai start. Britannia ta e actual flamante bi-campeon di Aruba, nan a gana Dakota pa di dos anja sigui den un finalisimo pa medio di tironan penal, y nan no tin niun intencion di lague copa bai.”Tri-campeon” ta zona hopi historico mes, pero “tin caiman na boc’i riew”.
Un pre-season c’a dura un poco mas largo cu den pasado, cu masha hopi actividad mes entre e club nan, Raymbert Bikker a tene nos na haltura di tur e acontesimientonan ey, hopi intersante mes, gran trabou! Na Aruba nos tin nos mesun experto a la Fabrizio Romano. Tabatin asina hopi actividad den transfers cu no tin espacio den e artikel aki pa menciona tur, pero nos lo menciona esnan mas impactante, sin duda, cu tur respet na tur e otro hungadornan.
SV Sporting cu a logra promove p’e campeonato aki y a cuminsa construi un ekipo cu algun nomber grandi, y a causa un “domino-effect” den Division di Honor; hungadornan man’e Ricky Hodge, Ashton Charles y Owen v/d Wijne entre otronan, Emerson Leocadio tambe, y Jean Marc Antersijn como goalkeeper, ta nomber nan cu ta resona, pa colmo na ultimo momento a dicidi di asigna e rol di DT na Maurice Escalona mes, un gran noticia. Dakota, La Fama y RCA tambe, tabata ekiponan cu tabata hopi activo mes p’a upgrade. En general tur ekipo a hasi nan mes moveshon. Ademas tambe Bubali, Estrella, Nacional, RCA y La Fama ta estrenando DT nobo. E liga ta man’e hayando un influho di un generacion nobo di DT, wanta duro! SC United a nenga di keda den e division mas halto y lo bai hunga den Division Uno e anja aki. Real Koyari asina a acepta pa bai purba nan suerte den Division di Honor.
Pre-season tabata hopi interesante mes, cu Britannia y Dakota hungando afo, hungando bon futbol y hasta ganando torneonan. Britannia a presta hopi bon mes den Club Shield y pa poco no a bai door na quart-final hungando contra ekiponan grandi di den Caribe. Despues nan bai gana e ABC Cup na Boneiro, ganando Jong Colombia, campeon di Corsow, na un manera convincente den final. Dakota tambe a bai gana e Copa SUBT na Corsow contra ekiponan hopi duro mes man’e Jong Holland y Jong Colombia. Hasta prensa Curasolenjo a bisa cu e team di Dakota ta un ekipo hopi organisa mes (profesional). Despues Dakota a bin gana e Copa Don Mansur n’Aruba. Ambos Club a saca nos cara den e competencianan mas grandi den region, esey ta bisa hopi di nos futbol, cu ta subiendo!
Fecha 1
E prome siman ta ofrece e siguiente match-up nan; tuma nota si cu e partidonan lo wordo hunga na stadion Frans Figaroa ainda, un decepcion sin duda pa hopi di e hungadornan di bala cu a spera di hunga na CDGT e campeonato aki.
Diabierna 24 October – 20:00 hrs – La Fama vs Estrella – Ban wak kiko e contingencia Canades (dos hungador mas di e pais frieuw pa hunta cu Anthony Walsh cu a hasi un gran papel den su debut p’e speransa berde di Savaneta anja pasa). E veterano capitan Sylvester Schwengle tambe ta bek na Savaneta, y Jair Farro tambe ta uni su mes biniendo di Nacional. Estrella ta un ekipo cu a perde hopi hungador, pero Lando Everon ta optimista cu hungadornan clave man’e Trevor Faro y capitan Naybert Elisabeth y otronan cu t’ey keto bai, semper leal na nan club, lo yuda nan bataya. Adryan Donayre tambe a join e ekipo di Papilon como nan portero number un e anja aki.
Diasabra 25 October – 18:30 hrs – Dakota vs Bubali – Dakota ta den “business mode” e campeonato aki, nan tin “appeltje te schillen” despues di a perde pa dos anja sigui den final y pa penalty! DT Jonathan Lake a pon’e su ekipo den hopi final mes den e ultimo anjanan, ganado dos toch. Dakota ta sigui ta un top ekipo cu por bai final atrobe ya cu nan a traha hopi mes pa mehora nan ekipo, nan tambe tin un gran organisacion tras di nan, lidera pa Carmichael Bikker, Gilmar Croes y compania. N’e otro banda, e duo dynamico di DT Jaime Carasquilla y dirigente hopi conosi Giovanni “El Toro” Croes, ambos responsable p’e progreso grandi di SV La Fama den e ultimo anjanan, awor ta den un projecto nobo cu e “orguyonan di Nort”. Bubali ta trahando riba un vision nobo y ta motiva pa subi den ranking y competi pa top 6 pa cuminsa. Antonio Fawcet Jr awor ta cu Bubali, e gran talento aki cu tabata fiel na United pa basta anja, alfin a habri hala y purba cu un ekipo nobo, bon idea di Bubali pa busc’e.
Diasabra 25 October – 20:30 hrs – River Plate vs Real Koyari – River Plate a haya nan mes ta hunga den Liga Plata anja pasa despues di un comienso slow den Division Honor, pero, DT Juan Valdez a hasi un bon trabou y a rebound hopi bon mes trahando cu lok’e e tabatin na su alcanse, y hasta a gana e final di Liga Plata. E anja ki nan ta spera di tin un bon consistencia y logra yega den top 6, esey t’e prome stap y sigui progresa cada bes. Real Koyari a dicidi di hunga den Division Honor pa prome biaha despues cu United a nenga di hunga den e liga mas halto e anja aki. Koyari tin basta veterano den nan elenco, pero DT Roland Rodriguez y compania a pon’e un ekipo hunto cu algun refuerzo di United mes tambe.
Diadomingo 26 October – 18:00 hrs – Sporting vs Nacional – Sporting a hasi hopi moveshon cu nan asenso pa Division Honor pa prome biaha. Hopi nomber grandi a bai pa nan, ta keda di wak con liher nan por “gel” hunto, p’aso traha hunto no ta algo automatico ya cu e hungadornan no conoc’e otro bon ainda, un reto, pero Maurice Escalona tin un bon temperamento como DT pa lidia cu esaki, nan mester tin pasenshi. Nacional tambe a pasa den duro anja pasa, despues di tabata den top 4 pa hopi tempo mes, den un era di hopi logro cu Dreyer Bracho, nan a gana hopi mes cu ne, hasta ABC Cup n’un manera dramatico. DT lo ta Wilson Galeano, e lo tin Devis Oliveros na su dsiposicion, ken no kier Oliveros den nan elenco, un di e goal-getter nan mas grandi cu Aruba a yega di conose, el a aporta hopi na nos liga. William Pardo, Jean Pierre Heyden a bolbe cu e Dragon nan di Alto Vista y tambe nan a haya Shaundrey Vrolijk como refuerso.
Diadomingo 26 October – 20:00 hrs – RCA vs Britannia – Un wega grandi pa sera e prome fecha, pero, mester ten’e na cuenta cu tur wega ta crucial den e formato aki, e seis prome nan ta keda den Liga Oro, y ta un biaha so bo ta hunga contra cada club pa clasifica pa Liga Oro. RCA cu nan DT nobo, Erik Santos y tambe hungadornan nobo man’e Jean Louis McKenley y Junior Mervielle, ambos cu hopi velocidad, tambe Jean Claude Faro y Ronaldo Valderama t’ey pa yuda consolida e medio campo tricolor, un como recuperador di bala y e otro pa maneho di bala, aha, pa dun’e velocistanan e bala dilanti den atake, kiko ta Santos su plan? RCA a keda den di tres lugar e campeonato pasa pero RCA siendo RCA no ta conforma cu nada bou prome lugar, asina ta wanta duro. Britannia ta keda e “Top-Dog” den futbol, nan tin e titulo ey dos anja sigui caba, ganando un di tres titulo lo cementa nan den e buki di historia di futbol Arubano. Nan tin practicamente dos ekipo, hasta perdiendo Ashton Charles y Sebasatian Montoya, dos pilar sin duda, nan por presta n’un nivel halto ainda, nan a haya Derwin Donato y Carl Geerman bek y tambe Joshua Aguirre foi Nacional, y e lo kier mustra su calidad atrobe. Elogio pa Renier Paraez y staff pa e gran trabou, sostene pa un gran organisation man’e Britannia bou tutelahe di Eddie Berg.
Tur Dialuna nos lo tin e resumen di resultado di e weganan di fin di siman, keda pendiente anto.