Den un partido final excitante, e Lady Pumanan di Britannia a derota Estrella biniendo di atras perdiendo 0-2, Britannia mester a bringa contra coriente, pa na final bin gana e wega 3-2 y titula campeon un bes mas, dos anja sigui y mas c’un dozijn di titulonan den e ultimo 15 anja, di berdad un dinastia di futbol femenino na Aruba.
–
Estrella a cuminsa duro y ta sorprende e ekipo faborito Britannia trempan caba. Na minuut 12 Natiushka Kwidama ta anota un gol trempan pa habri marcacion, Estrella ta bay ariba 1-0.
Ok, esey por ta algo cu por pasa, hasta cu un ekipo grandi man’e Britannia, pero no! Na minuut 17 Natiushka Kwidama atrobe ta sorprende tur hende riba cancha, na stadion, riba television y internet, e ta anota un di dos gol consecutivo pa hasi e wega 2-0 p’e naranhadanan di Santa Cruz. Estrella den control di e wega, den anotacion y tambe den e mente di Britannia.
–
Natiushka Kwidama a anota dos gol pa pon’e Estrella den bentaha trempan den e wega final di ‘Damas Open Class’ – foto cortesia DAC
–
Ta dura basta tempo prome cu Britannia por a “regroup” y realisa cu nan ta den problema y algo mester wordo haci imediatamente, pero, con bo por cuminsa na subi e sero halto cu nan a haya nan mes dilanti dje? Un poco di panico a drenta e hungadornan di Britannia ora cu nan no por pon’e e bala den gol pa sikiera drenta den e wega, “never mind” gana e wega.
Den momentonan critico man’e esaki hopi biaha t’un heroe tin cu lanta un ekipo. Ora cu tabata parc’e cu halftime lo a bay aden cu Estrella ariba 2-0, cu lo tabata un tremendo resultado p’e ekipo oranje pa cuminsa e di dos tempo, poniendo mas presion ainda riba Britannia, e heroe di e pumanan ta aparece. Zayana Rogers, e hoben talento di apenas 15 anja, hungador di seleccion nacional grandi, ta anota na minuut 42′ pa trece alivio pero tambe speransa pa Britannia. Estrella 2 – 1 Britannia na halftime.
–
Zyana Rogers, hoben goleadora di SV Britannia, a briya atrobe den e wega contra SV Estrella den e gran final di futbol femenino di Aruba – foto cortesia DAC
–
Den e di dos tempo Britannia a sali cu hopi briyo, Estrella a man’e retrocede pa defende e bentaha, y pa un largo tempo nan a logra tambe. ‘Nada pero nada’ di e atakenan di Britannia a duna probecho, e bala djies no kier a drenta gol. Stress y panico tabata drentando e fanaticada Puma y tambe por a wak esey den algun di e hungadornan di e ekipo di Piedra Plat.
Nos ta casi drentando minuut 80, p’e ultimo minuut nan di e wega y den un di e hopi yegadadan di Britannia, tur sin resultado, unda cu ya no tabatin mas pa inventa, Zyanna Rogers den un momento individual ‘mahestral’ ta laga varios hungador di Estrella atras, un poco p’afor di e area penal, basta leu di e porteria contrario y ora cu e tabata cayendo abou, e ta los un tiro imposibel, pero duro, y ta bati e portero di Estrella Alondra Boscan cu tabatin un anochi di hopi trabou, p’e empate agonico na 2-2.
–
SV Estrella y SV Britannia a duna nos un partido dramatico p’e campeonato Damas Open Class 2025-2026
–
Britannia ta sinti cu nan ta den un “flow” y a bisa ‘ban purba gana e wega aki awor mes’, awor cu Estrella t’abou moral y fisicamente. Nan a bay p’e victoria, na minuut 82 mes, Keylee Vlijt, cu ta ricibi un tiro di skina perfecto for di e legendario Mylene Croes, cu tabata hungando su ultimo partido den su carera hunto cu su companjera di hopi anja y bataya, e gran Angele Winklaar. Mylene ta pon’e e bala net pa Vlijt cabesea e bala den net n’e prome palo. Dramatico, Britannia a logra, nan a demostra cu nan ta un ekipo dinastia unda cu e uniform mes a cuminsa pisa hopi, nan ta haya manera pa gan’un wega, p’esey nan ta e legendarionan den futbol femenino di Aruba, ya ta tempo p’e Lady Pumanan cuminsa traha mas vitrina pa nan tantisimo trofeonan.
Pabien na Britannia cu un otro campeonato mas, pabien tambe na Estrella pa brinda nos un gran bataya den e tremendo final aki.
–
Britannia “Lady Pumas” un biaha mas ta campeon di e top futbol femenino di Aruba – e dinastia di Piedra Plat – foto cortesia DAC
–
Resumen:
⚽ 12′ Natiushka Kwidama EST ⚽ 17′ Natiushka Kwidama EST ⚽ 42′ Zyana Rogers BRI ⚽ 79′ Zyana Rogers BRI ⚽ 82′ Keylee Vlijt BRI
