–
Bubali SC vs SV Estrella
Sorpresa! no necesariamente den e resultado pero den e anotacion abulta. Bubali a demostra cu e tres wega cu nan a perde te cu awor tabata contra ekiponan top 4, ekiponan grandi man’e Dakota, La Fama y RCA, unda cu nan a perde di chiripa realmente den tur tres partido, hungando bon. Por ta cu Bubali ta mihor cu nos ta pensa y esey lo keda demonstra ora nan hunga contra ekiponan fei top cuater? Den e partido aki nan a mustra cu nan ta den un bon nivel realmente y cu Giovanni Croes y Jaime Carasquilla ta trahando riba un bon projecto c’e “Orguyonan di Noord”. Estrella tabatin un prome tempo desastroso unda cu Bubali tabata semper un stap mas delanta cu nan. Den di dos tempo e “Naranhadanan” a cuminsa hunga miho bala unda nan a hasta anota e gol di honor, por bisa cu nan a gana e di dos tempo (1-0) na un manera of otro, pero e danjo tabata hasi caba den prome tempo, y pa bin bek abou 0-5 tabata pidi dimas. Antonio Fawcett a hunga su mihor partido te cu awor, el a habri hopi espacio y a crea hopi chens pa su companjeronan.
⚽’12 Luis Hurtado BUB ⚽’15 Brayan Morales BUB ⚽’27 Brayan Morales BUB ⚽’40 Miguel Pombo (PK) BUB ⚽’47 Deibi Rocero BUB ⚽’ 77 Kevin Pena (PK) EST
🟨’38 Bernabela BUB 🟨’73 Lampe EST 🟨’88 Kock EST
–
Real Koyari vs SV Dakota
Dakota tabatin un wega di practica mas bien cu Koyari, nan a hasi lok’e nan kier den e partido aki, e score por tabata mas abulta ainda. Dakota tabatin sigur 80% di posesion di bala cu multiple tironan riba gol, hasta e hoben nan U20 cu a drenta den e di dos tempo a hera anota gol. Over Garcia tabatin cuater gol den e partido aki y Camilo Peña e volante goleador di Dakota tabatin un rol di distribui y crea chens pa su companjeronan e biaha aki., Woodeney Jean Baptiste cu su dos golnan a bira e lider di goleadornan cu 6 gol empata cu su companjero di ekipo Over Garcia. Cu e resultado aki Dakota ta cementa nan mes den prome lugar di e campeonato aki, keto bai empata si cu La Fama cu tambe a gana nan wega, 12 punto ambos pero Dakota cu un mihor diferencia (saldo) di gol (+19) compara cu La Fama (+5). Un partido cu hopi gol pero nada di carchi otorga.
⚽’5 Sebastian Montoya DAK ⚽’15 Woodeney Jean Baptiste DAK ⚽’18 Over Garcia DAK ⚽’21 Diederick Luidens DAK ⚽’35 Juan Camilo Cervantes DAK ⚽’41 Over Garcia DAK ⚽’51 Woodeney Jean Baptiste DAK ⚽’57 Rolph Derisca DAK ⚽’70 Nickenson Paul DAK ⚽’85 Over Garcia DAK ⚽’89 Over Garcia DAK
Nota: no tabatin carchi den e partido
–
SV Deportivo Nacional vs ASV River Plate
River Plate semper a hunga Nacional duro, pero Nacional a sali venecedor den mayoria di e partidonan entre e dos ekiponan aki den e ultimo anjanan. E biaha aki si no, apesar cu Nacional a bai ariba prome y hopi trempan tambe na minuut 6 caba cu e gol di Jose Gil, pero River a sigui hunga nan wega y a cuminsa gana e bala mas biaha y tira dilanti. John Rick Kelly a anota e gol di empate pa medio di penalti na minuut 16. Den di dos tempo River a man’e haya mas briyo y a cuminsa ataka hopi, apesar cu Nacional tambe tabatin nan momentonan den e area penal contrario, chens nan no tabata falta, un wega habri di banda pa banda, “spannend” sin duda. E gol di victoria di e oncena di “Playa P’abou” a bini den un contra-golpi relampago y fulminante cu a resulta den un gol di Shakame Stamper na minuut 60, Nacional a purba te final pero no a logra e gol di empate. River asina ta subi na puesto 5 riba tabla di claisificacion, Nacional a keda apega na 3 punto den di nobeno lugar, pero toch un punto su aleha foi puesto 6.
⚽’6 Jose Gil NAC ⚽’16 John Rick Kelly RIV ⚽’60 Shakame Stamper RIV
🟨’34 Eman NAC 🟨’47 Kongo NAC 🟨’61 Hooi NAC 🟨’83 Karamantana RIV
–
SV Britannia vs SV Sporting Aruba
Riba papel esaki mester tabata un victoria p’e campeon Britannia, no tabatin duda, pero ‘e bala ta rondo’. Sporting a bin ta creciendo como ekipo y nan wega ta subiendo hopi liher n’un nivel bastante mihor awor. Den e partido previo por poco nan a saca un punta contra RCA. Britannia a gana tres wega sigui y tur cos ta parc’e cu nan lo por mantene paso cu Dakota y La Fama den top di tabla, apesar cu toch den nan ultimo partido nan a sufri un poco prome cu nan a logra gana River Plate (2-1). Den e partido aki Sporting a duna bataya, pero Sporting por tabatin hasta un mihor resultado ainda si nan no a faya nan di tres tiro di penalti di e campeonato aki, ken sa si nan a logra anota nan unda nan lo ta awor? Ricky Hodge si a logra su prome gol pa su ekipo nobo pa habri marcacion na minuut 27, pa despues su ex companjero den Dakota, Fernando de Sousa, empata e wega p’e Pumanan nan minuut 36. Sporting asina ta keda den contencion pa bay Liga Oro, nan ta den di 6 puesto riba tabla. Britannia ta keda na di tres lugar.
⚽’27 Ricky Hodge SPO ⚽’36 Fernando de Sousa BRI
🟨’51 Peralta BRI 🟨’52 V/D Wijne SPO 🟨’77 Vielma BRI 🟨’84 Tromp BRI 🟨’90 Merite SPO 🟨’90 Vielma BRI
🟥’90 Vielma BRI
–
SV La Fama vs SV Racing Club Aruba
La Fama ta riba un racha ganador desde cuminsamento di campeonato, terminando den puesto cuater den e campeonato pasa tabata hopi bon mes pero tur cos ta parc’e cu nan kier bai mas leu e biaha aki. Te cu awor nan ta mustra un ekipo dificil pa derota, apesar cu nan tin falta di mas gol toch (averahe di gol pa wega ta 2.25) ta nan defensa ta teniendo nan den wega. RCA a bataya duro pa gana Sporting cuater dia promer, y tabata di spera c’un ekipo tricolor basta veterano lo a sinti un poco den e fisico cu masha poco dia pa keda cla p’e wega aki contra La Fama. Toch RCA a bataya, pero kizas ta den e detayenan nan lo mester a sinti’e con cu bai cu bin. La Fama tabatin mas iniciativa, posesion y yegada den e prome tempo y prome parti di e etapa complementario. E savaneteronan a bay den halftime ganando 1-0. La Fama ta sigui cu nan wega y ta amplia bentaha na minuut 50. Toch RCA a bataya mas den e di dos tempo, nan a haya un penalti na minuut 65 y Jhon Silva no ta faya y asina nan ta corta bentaha, pero e holoshi no tabata nan amigo, y apesar di basta presion riba La Fama, cu a man’e perde focus na final di wega, partido ta termina 2-1 pa La Fama cu a keda pareu cu Dakota den punto pero ta den di dos puesto debi na “doel-saldo”. RCA ta keda den di 4to lugar.
⚽’42 Delayno Jansen LAF ⚽’50 Lewis Bermudez LAF ⚽’65 Jhon Silva RCA (PK)
🟨’11 Koorndijk LAF 🟨’56 Rengifo RCA 🟨’58 Rangel LAF 🟨’ 62 Bermudez LAF 🟨’65 Mina RCA 🟨’95 David LAF
