E ‘deporte rey’ futbol tabata bon representa e aña aki den e entregamento di ‘Premio Excelencia den Deporte‘ 2024. Zyana Rogers, Zinou Winklaar y e Seleccion Nacional GU-15 a sali ganador.
–
Zyana Rogers, un di e nominado (individual) pa ‘Deportista di Aña’, tambe a wordo nomina conhuntamente cu su otro compañeronan di e seleccion GU-15, cu a sali campeon di Concacaf Liga C na 2024, e ekipo a wordo nomina p’e ‘Ekipo di Aña’ den e evento di entregamento di “Premio Excelencia den Deporte” di Aruba.
Zyana awor ta forma parti di e elenco (seleccion nacional mayor), cu a hunga e partido hopi importante di ‘Concacaf W Qualifiers’ contra Saint Kitts & Nevis, e mesun anochi ey, na Stadion G.P Trinidad. Den e partido aki e ekipo femenino di Aruba a marca un paso grandi den nan historia c’e prome wega di clasificacion na cas p’un mundial femenino (den e caso aki ‘Mundial Brasil 2027’) y alabes tambe un prome victoria contra Saint Kitts & Nevis (2-1) den nan historial.
Mientras c’e partido tabata andando den “full swing” na stadion G.P. Trinindad, e premionan nan tabata wordo entrega, no mucho leu, na Renaissance Convention Center. Algun di e compañeronan di Zyana den e ekipo campeon di e torneo GU-15 aña pasa. Hungadornan man’e e capitan di ekipo Niamh Tromp, Denicienne Maduro, Adannayah Breinburg, tambe tabata hunto cu Rogers na stadion, ademas tambe, nan propio head-coach campeon, Joally Lake, cu actualmente ta assistant coach di e seleccion nacional mayor.
–
Zyana Rogers di Aruba den accion den e torneo di Concacaf GU-15 League C unda el a keda como “goal-getter”
–
Zyana a gana e Premio Excelencia den Deporte pa mihor ‘Deportista Femenino den categoria di 14-17 aña’ pa su contribucion grandi n’e seleccion campeon di GU-15 unda el a sali e topscorer den e torneo di Concacaf.
Otro galardon p’e famia di futbol a wordo gana pa Zinou Winklaar di e club San Luis Deportivo di Savaneta. Zinou no ta un desconoci den e mundo di futbol, ya cu el a sali escohi recientemente como MVP den e categoria di U-9 Liga Oro den e evento di “Award Night” di AVB. Awor, den e evento di “Premio Excelencia den Deporte” a wordo escohi como ‘Deportista Masculino – Categoria 6-9 aña’ (entre tur deportenan), un gran logro p’a Zinou y futbol en general.
–
Zinou Winklaar cu number 3 (man robes) hungando pa San Luis Deportivo contra Deportivo Nacional den U-9
–
Na final, e premio pa e “Ekipo di Aña” den Premio Excelencia den Deporte, a wordo gana p’e seleccion femenino di futbol UG-15 mes, nos no tabatin duda. Un ekipo prepara y dirigi pa head coach Joally Lake, asisti pa Lerjan Caceres y demas ‘curpa tecnico’ y staff, cu a facilita e futbolista hobennan cu tur lok’e nan tawatin mester p’e logro grandi aki.
–
–
E lista di hungadornan cu a forma parti di e seleccion di Aruba campeon di Concacaf GU-15 League C y awor ganador di e premio “Ekipo di Aña” den ‘Premio Excelencia den Deporte’:
T. Rafael, D. Veenstra, N.Tromp (C), D. Leerdam, J. Kock, C. Sempertiguez, C. Geerman, A. Franken, K. Brete, L. Angela, Z. Rogers, N. Kwidama, N. Denz, D. Maduro, S. Gois Santos, A. Breinburg, S. Rumnit, N. Moncayo
Pabien na tur.
