Momento di confusion y controversia a cambia cara di e wega y apesar cu Jamaica a domina e partido, toch cos por a pinta diferente pa nos seleccion – un analisis
–
Aruba U-17: r-d para: Franken, Rogers, Breinburg, Harms, Angela, Veenstra, dilanti: Maduro, Perez-Molina, Brete, Kwidama, Tromp (capitan) – foto cortesia di AVB
–
Aruba su muchanan a enfrenta y respond’e e grandinan di region di Caribe sin miedo – foto cortesia di AVB
–
E seleccion Jamaiquino, e “top dog” den Caribe, a lansa den atake cu tur cu nan tin for di pitaso inicial caba, cu nan conocido velocidad y corpulencia nan a pon’e nos seleccion bou presion, nos muchanan, mescos cu tabata e caso den e wega contra Honduras, y apesar cu tur dos pais ta di ranking hopi mas halto, nos a sa di wanta e resultado. Jamaica tawatin 14 tiro y 8 riba gol, kiermeen tironan di peliger, halftime a bai aden 0-0.
Na cuminsamento di e di dos tempo Jamaica a hasi dos cambio, un di nan tawata Elizabeth Miller, un hungador di hopi experiencia. Net un minuut despues (’46) ya Miller a hasi en efecto grandi; e ta pone e bala den box pa su companje Ricquanna Richards anota e prome gol di e partido p’e bentaha di 1-0 p’e “Reggae Girlz”, gol cu pia drechi mei mei di e tres palonan.
–
Zyana Rogers atacando den e wega contra Jamaica U-17 – foto cortesia di AVB
–
Jamaica ta sigui ataca y Aruba ta sigui defende. Den e partido Jamaica a hasi un total di 31 tiro/15 riba gol, 13 tawata salba pa Veenstra, y tambe tawatin posesion di bala pa 60% den e wega. Pero si mester bisa cu n’e punto aki den e di dos tempo, Aruba tawatin un poco mas salida, algun escapenan den atake pa purba sorprende e pais di Bob Marley, apesar cu en general e aspecto di condicion fisico tambe a faborece Jamaica den e partido aki.
Na minuut 61 for di un tiro liber di hopi distancia, Adannayah Breinburg a hera banja por completo London Cathey, e portero di Jamaica cu ta “manotea” e bala y ta lag’e cai unda Liandra Angela ta toc’e bala den net p’e empate, 1-1.
Pero akinan cos ta bira complica y un poco controversial, e asistent di referee ta hisa bandera indicando offside di Angela, referee principal a caba di indica gol, Aruba ta cuminsa celebra bayendo p’e fanaticonan banda p’ariba. Referee ta wak e bandera y ta cambia su decision pa offside, un poco laat. Jamaica ta wak un oportunidad cu ekipo di Aruba ta na otro banda di cancha, referee a laga e wega sigui apesar cu algun hungadornan di Aruba tawata ainda foi cancha. Jamaica ta sac’e bala di biaha riba rechts, pero pa ora e number 7, Ricquanna Richards ta haya e bala for di su companjera, e por tabata adelanta su mes tambe. Enfin, e ta sprint y los un tiro duro di distancia cu a duna portero Dylana Veenstra un contratempo, e ta rechasa e bala pero e ta cai net den pia di Miller cu ta chip e bala den net p’e 2-0 pa Jamaica.
–
Portero di seleccion di Aruba, Dylana Veenstra, tawatin 13 tiro salba den e partido aki – foto cortesia di AVB
–
Asina mes a partido ta termina, e muchanan completamente agota y desapunta cu e gran oportunidad perdi, e oportunidad pa empata cu Jamaica, un ekipo mas grandi y superior, e por tawata un momento historico sacando un punta di e partido aki. E resumen ta cu Aruba cu poco a hasi algo, cu poco nan a bataya e grandi, niun hende no por bisa cu e partido no tabata competitivo, apesar di e “statistiek” nan cu a faborese Jamaica den grandi, locual ta duidelijk ta cu Jamaica a haya nan den un bataya te final cu e “Rising Briyante Girls”, e escenanan na final di wega ta bisa hopi.
–
Notanan final:
Den e prome partido di e anochi, Honduras a gana Saint Vincent 15 – 0.
Aruba lo hunga contra Guyana diahuebs awor (29 di januari) pa 8:00 pm
–
Resumen:
⚽’46 Ricquanna Richards JAM ⚽’62 Elizabeth Miller JAM
🟨’64 Predergas JAM 🟨’74 Daley JAM 🟨’77 Franken ARU
–
