–
Un gran comienso di un era nobo p’e seleccion nacional femenino, un partido tenso y sera te final. Ta ‘prome-prome’ biaha cu nos ta gana Saint Kitts & Nevis, un ekipo rival cu “tabatin” nos number antes, awor, tin un otro biento ta suplando.
–
Un partido cu no tabata nada facil, pero nada ta bai ta facil den e proceso aki pa bai mundial. Tur e ekiponan den e ‘grupo E’ aki ta rank mas halto cu Aruba, Saint Kitts & Nevis mes ta rank casi 50 posicion riba nos (137 vs 186 di Aruba), pero ami lo tira tur e “gedoe” di ranking afo p’awor, p’aso nos cu a wak e seleccion aki hunga den e ultimo dos añanan, sa cu rank number 186 no ta klopt mucho, pero, nos por huse como un motivacion, pa demonstra cu nos por competi y hasta gana, pakiko no? Den e ultimo dos añanan nos a logra gana Trinidad & Tobago (rank 75), Suriname (rank 135) y Korsou (rank 179), tur ta rank mas halto cu nos. Aruba su rol ta bai ta esun di “dragonslayer”, esey ta e mihor manera pa pon’e den contexto.
–
(Photo by Davyne Croes/ DAC Image)
–
Den e prome trinta minuut di e wega aki, Saint Kitts & Nevis tabata hopi mas fisico; dominando, nan tabata gana casi tur bala, atakando y menasando. Aruba a cuminsa un poco timido, nervioso kizas? pa colmo Saint Kitts & Nevis t’a anota tambe riba dje, pa hasi cos mas pio ainda. Phoenetia Browne cu ta hunga profesionalmente cu RCD Español den ‘La Liga F” na Spaña (top liga femenino na Europa hunto cu Women’s Premier League), un di e mihor hungadornan di Caribe, ta anota na minuut 36 pa pon’e e “Sugar Girls” ariba, un asistencia di su capitan Cloey Uddenberg, un di e mihor hungador tambe riba cancha e anochi aki, Aruba 0-1 Saint Kitts & Nevis.
Portero di Aruba, Hadassah Kock, mester a hasi tur cos pa salba su ekipo na algun occasion. Cualkier otro ekipo lo a dobla warda y haya mas gol en contra, asina cos tabata mustra te n’e punto ey. Pero man’e nos a bin ta observa, esaki t’un otro ekipo Arubano, cu mentalidad y “garra” (pa fia e palabra hopi husa na Argentina y mas ainda na Uruguay), e ta bin di “Garra Charua” cu ta nifica “fighting spirit”.
–
–
Aruba a logra controla e candela, poco poco nan a cuminsa drenta den e wega, esaki tawata un partido di mentalidad, pasenshi, y condicion fisico. Nos a bisa cu trempan Saint Kitts & Nevis tabata domina nos cu nan forsa fisico incluyendo den coremento y bulamento, n’un dado momento nan tawata mustra hopi mas grandi y fuerte cu nos hungadornan, esey tabata e impresion! Pero, Aruba a inverti den ‘condicion fisico’, ademas di mentalidad, y “garra”. Esey tawata e clave den e partido aki.
E tormenta a pasa, bon trabou di e oncena di Aruba, pero vooral Soraya Verhoeve cu a trece calmo, el a cuminsa corta atake, gana bala y tambe e ‘bataya den medio campo’, el a hasta asisti den e dos golnan di Aruba, el a demostra kiko un number 6 por hasi ora cos ta duro. E wega a stabilisa pa Aruba banda di minuut 40, e gol di empate a yega na minuut 43 pa medio di Tarianna Doornkamp for di un pase perfecto di Verhoeve mes, un gol clinico di Doornkamp. Aruba 1 – Saint Kitts & Nevis 1, asina half-time a bai aden, wega empata.
Aruba a cuminsa hopi mas energetico y decisivo den e di dos tempo, nan a man’e bai den “high gear”, imponiendo tambe un “pressing” feroz, t’e palabra adecua. Saint Kitts & Nevis no tawatin contesta p’esaki, nan no sa kiko a dal nan realmente, e “Briyante Girls” nan cuminsa hunga briyantemente, despues cu nan a sufri den e prome tempo, awor nan ta imponiendo e ritmo di e wega.
–
–
E golpi final a yega, por bisa merecidamente pa Aruba, pa nan esfuerzo den di dos tempo, na minuut 62. Un tiro liber ful na banda drechi cerca di e linea lateral, un 35 meter n’ey leu, Verhoeve a pon’e bala den area penal unda cu Genesis Hazel ta cabesa perfectamente pa bati portero Kyra Dickinson p’e 2-1. Apesar cu Aruba no a logra un di tres gol pa sigura e victoria, toch nan a keda cu dominio di e bala te na final, testimonio di nan gran preparacion di condicion fisico, hopi pulmon mes. ‘Al fin al cabo’ Aruba mes t’esun cu a keda para riba pia, the “last woman standing”.
–
(Photo by Davyne Croes/ DAC Image)
–
Victoria y tres punto p’e ‘Briyante Girls’, un hopi bon comienso den un grupo cu hopi “Goliath”, Aruba ta parce man’e un “David” bayendo contra nan tur, sin miedo, ganando respet y triunfando den weganan di futbol.
E ekipo a hunga man’e ‘un ekipo’, tin masha hopi hungado pa menciona, pero mencion special ta bai pa Genesis Hazel y Tarianna Doornkamp pa nan golnan sublime y oportuno. Michaella Neto cu tabata solido den defensa central, eventualmente a logra evita mas danjo grandi for di e semper peligroso Phoenetia Browne e resto di e wega. E “player of the match” ta Soraya Verhoeve, capitan di e seleccion. Pabien tambe n’e staff di support, head-coach Van der Laan, assistant coach nan Lake y Sambo, demas techniconan, un ekipo ganador cu a traha duro pa sostene e hungadornan.
Aruba awor tin un “bye” unda nan no ta bai hunga e siguiente partido di grupo E te na 7 di Maart (2026), contra Cuba, akinan na Aruba, ban spera cu e biaha ki si stadion lo yena hopi mas cu awenochi pa wak e “Briyante Girls” hunga un futbol excitante.
–
Recap
⚽’36 Phoenetia Browne SKN (Assist: Cloey Uddenberg) ⚽’43 Tarianna Doornkamp ARU (Assist: Soraya Verhoeve) ⚽’62 Genesis Hazel ARU (Assist: Soraya Verhoeve)
🟨’ 92 Netto ARU 🟨’96 Browne SKN
