E seleccion a caba e ciclo di eliminatorio pa Mundial Brasil 2027 c’un “Broche de Oro”, nan a pon’e e pluimpje rib’e bolo na Stadion Rignaal ‘Jean’ Francisca, ganando di e seleccion di Korsou n’un forma mas cu convincente; nan a sigura e di tres lugar den e grupo, demostrando cu nan por competi n’un nivel mas halto awor, y di awor en adelante nan ‘no’ lo wordo considera ekipo chikito mas.
–
Adannayah Breinburg celebrando e di cinco gol di Aruba hunto cu su companjera nan di ekipo – Aruba a gana Korsou 6-1
–
Aruba a cuminsa e eliminatorio (Concacaf W Qualifiers) e mas abou den ranking den e grupo aki. Di biaha den nan prome wega nan a despacha Saint Kitts & Nevis cu ta rank 141 (25 puesto mas halto cu nos), 2-1 na Stadion Trinidad. Despues Cuba (rank 94) a yega Aruba y pa chiripa a gana nos 1-0 c’un gol milagroso di distancia, un partido cu Aruba tabata igual of hasta levemente mihor.
E siguiente partido na Panama tabata un clash cu e “top-dog” mes den e grupo y un faborito pa bay mundial (rank 56); Aruba a bataya pero a perde, e score di 1-3 no ta refleha realidad. E pinalti fantasma na 73′ a opaca e logro. Atras 1-2 bayendo den e ultimo minuut nan lo tabata mas husto, p’aso Aruba a hunga mihor den e di dos tempo y a merece mas contra un ekipo cu ta rank 130 puesto mas halto cu nos!
Awenochi na stadion Rignaal ‘Jean’ Francisca, nan a hunga contra un seleccion di Korsou (cu tambe tabata rank mas halto cu nos, prome cu e partido, ya no mas), c’un chens pa demostra con bon nan ta, kizas mihor cu nan mes a pensa. Awor ta tempo pa bay pa mas, di awor en adelante nan por “dream bigger”, pakiko no?
Aruba a start e partido aki na Willemstad cu gran urgencia y intensidad, Korsou no tabata sa ta kiko a dal nan, e ekipo Arubiano tabata den “total focus” y determina, hasta un poco ‘rabia’, p’aso nan lo kier a “proof” nan mes despues di e wega na Panama algun dia pasa. Nan no a laga bai di e bala fei cuminsamento di wega y na minuut 6 ya ta canta gol, e prome di e wega, bunita gol di Tarianna Doornkamp cu asistencia di e hungador hoben Adannayah Breinburg. Aruba 1-0 Korsou.
Siguientemente Aruba ta sigui ta c’e bala, pero tambe toch a wanta un poco, nan a retene mayoria di e bala p’un diez minuut mas, sabiendo cu Korsou lo bay sali todo por todo pa empata e wega, nan a bay cu cautela, bon move! dicho hecho, Korsou alfin a tuma beslag di e bala y nan tabatin mas yegada di peliger entre minuut 20 y 40, Aruba a sa di defende, bon trabao di Genesis Hazel y compania, y nan a busca salida ora a haya espacio den e atakenan grandi di e rival contrario.
Den nan mihor momentonan di posesion den e prome tempo, Korsou tabatin tres tiro peligroso riba porteria defend’i pa Hadassah Kock (cu a bin ta hasi hopi progreso mes den su rol), a hay’e ta hasi un ‘dobel salbada’, tremendo, pa despues di un minuut haci otro salbada spectacular pa mantene e wega 1-0 pa Aruba.
Den tur esaki, Aruba a cuminsa haya mas yegada di peliger den “counter-attack”, y na un di e yegada nan aki nan ta haya un freekick net na rand di area penal di Korsou na minuut 43, unda capitan di Aruba, Soraya Verhoeve no ta pordona y ta anota un ‘delicioso’ gol p’e 2-0 pa nos seleccion, y asina halftime ta bay aden.
Den e di dos tempo, Korsou a sali mas agresivo, decidi pa anota un gol pa corta bentaha y drenta den e wega. Nan a logra tambe, ora cu na 52 minuut portero di Aruba, Hadassah Kock, cu eigenlijk tabatin un hopi bon wega, a faya den un intento di rechasa e bala den un atake peligroso di Korsou, na rand di area penal, e bala a “drief” drenta den area penal unda e hungador Amazia Burnet ta push’e bala den gol p’e 1-2.
–
Tariana Doornkamp (7) a anota dos gol den e partido unda Aruba a derota Korsou 6-1 p’asina culmina e Concacaf W Qualifiers – Foto cortesia Concacaf
–
Aruba ‘no a perde pa gana’ y ta bay den atake mesora, ni un minuut despues, Aisse Gumbs ta wordo tumba den area penal y referee ta pita pinalti pa Aruba. Tarianna Doornkamp ta anota clinicamente su di dos gol di e wega for di punto penal p’e 3-1 na fabor di Aruba.
Poco poco e condicion fisico di Aruba a cuminsa impon’e den e wega, nan a coy e bala bay cu n’e y scondi’e p’e resto di e partido. Na minuut 67 Aisse Gumbs ta haya un pas’e di Soraya Verhoeve y ta anota otro gol pa Aruba, pa hasi e wega 4-1.
Atakenan Arubiano ta sigui y e siguiente gol ta cay na minuut 80 pa medio di Adannayah Breinburg, cu tabatin un gran partido, y net prome cu el a wordo substitui, e ta haya un pas’e for di hopi leu di e defensor central Michaela Netto, cu wega trei wega ta consolidando su mes como un gran hungador cu ta defende bon y tin vision tambe p’e wega ofensivo, sigur candidato p’e “player of the match” awenochi (hunto cu Breinburg, Verhoeve, Doornkamp..). Breinburg ta haci magia c’e bala c’e la haya y “a la Ronaldinho Gaucho” ta anota e gol p’e 5-1.
Aruba tabatin e luhosidad di haci mas cambio c’e bentaha grandi, dunando mas hungador nan un chens pa subi cancha y experencia e gran momento aki. Na minuut 90+4, Jennifer Henao ta anota e ultimo gol di e partido, unda Henao ta haya e bala despues di un rebote den area penal (hugada atrobe cuminsa pa Michaela Netto) y ta deposita e bala den net p’e 6-1. E hobennan a celebra den grandi, merecidamente.
–
Pitaso final – Seleccion femenino di Aruba celebrando nan gran victoria den e ‘Derbi Antiyano’ riba Korsou na stadion Rignaal ‘Jean’ Francisca na Willemstad – Foto cortesia Concacaf
–
Partido ta termina c’un gran victoria p’a nos seleccion riba Korsou, kizas un di e victorianan mas grandi di tur tempo riba nos hermana isla. Caranan contento, feliz c’e logro, algun lagrimanan di euforia y emocion, kizas alivio, y brasanan duro. P’esaki nan ta hunga bala den e deporte rey, nan ekipo ta victorioso, nan a logra mas cu nan meta, pa nan pais.
Pabien na henter e ekipo, n’e hungadornan y tambe e staff di coach y asistent nan, un ehemplar trabou di ekipo.
Nota: nos ta manda palabranan di condolencia y forsa na Joya Tromp (rechtsback di Aruba) y su famia c’e perdida di nan wela (RIP).
–
Recap:
–
⚽ 6′ Tarianna Doornkamp ARU ⚽ 43′ Soraya Verhoeve ARU ⚽ 52′ Amazia Burnet CUR ⚽ 54′ Tarianna Doornkamp ARU ⚽ 67′ Aisse Gumbs ARU ⚽ 80′ Adannayah Breinburg ARU ⚽ 90’+4′ Jennifer Henao ARU
🟨 4′ Strijdhaftig CUR 🟨 42′ S.Martina CUR 🟨 50′ K. Martina CUR 🟨 69′ Burnet CUR🟨 84′ Gumbs ARU
