Un Comentario
–
Cualke hende cu wak e resultado di e ultimo tres partidonan di e seleccion U17 di Aruba den e torneo eliminatorio pa Mundial Femenino U-17 – 2026, lo tir’a man den laira y kizas keha c’e resultadonan, apesar cu toch e scorenan tabata sera y e weganan tawata competitivo. Pero, ta bon pa pon’e cos den perspectiva, pa sa mihor prome cu nos saca conclusion. E comentario aki ta mas bien pa motiva, no pa excuus, e por ‘drive’ nos muchanan, y p’a dia cu e torneo “bootcamp” aki termina, nan lo a sinja hopi mes, den termino fisico, pero tambe mental.
–
–
E Arubiano no ta hende di keha, e no ta den nos sanger pa reclama di biaha. Mi ta sigur y mi no a tende niun keho di ningun miembro di e seleccion, niun kiekmento, tur lok’e mi a observa te awor ta solamente positivismo y “never-give-up attitude”, y ta esey mes t’e manera mas corecto pa anda den e mundo aki, pero no ta tur cos ta semper man’e mester ta den e mundo aki, no ta tur cos ta color di rosa. Ami si ta bai keha un poco.
Como bos independiente, sin afiliacion n’e seleccion, ni e bond, ni Concacaf, mi tarea ta pa bisa cos manera e ta, pa e bon di nos deporte y pais, pa nos sinja di otro y pa nos progreso, semper constructivo, apesar cu no ta tur ora un opinion ta popular.
Ok, e muchanan di e seleccion aki a caba di hunga nan wega ayera nochi contra Guyana, otro pais cu ranking mas halto, tabata Aruba su di tres partido den apenas cuater dia! Bo a lesa esey bon, kiermeen cu Aruba tawatin menos cu dos dia di descanso entre nan weganan, e cos aki no ta klopt.
Ekiponan di Premier League Ingles, e liga mas intenso den “scheduling” na mundo, mes, nunca ta hunga cu menos di tres dia di descanso. Awor hopi lo bisa; esey ta mescos pa tur e ekiponan participante den e torneo U-17 aki toch? No, no necesariamente; e grandinan man’e Honduras, Jamaica y Guyana tur tin un descanso di dos dia ‘extra’ mei mei di e evento. Solamente Aruba y Saint Vincent tin menos cu dos dia di descanso entre ‘tur’ nan weganan. P’a ora cu Aruba hunga contra Saint Vincent diasabra awor (Aruba su ultimo partido), nan lo a hunga cuater wega ‘sigui’, den solamente seis dia, mas cu Saint Vincent mes n’e punto ey (Saint Vincent lo a hunga dos wega prome c’esey, diasabra lo ta nan di tres wega), esaki ta hopi duro pa cualkier ekipo.
–
Seleccion U-17 di Aruba den pleno training – foto cortesia AVB
–
P’a hunga futbol, bo mester di bo dos pianan den bon condicion, pa core, bula y pa scop bala. Ni maske cuanto gana, curason y pasion bo tin, yen di “fighting spirit”, garra y berguensa deportivo, bo mester di bo pianan pa hunga bala, “mind over matters” ta yega asina leu so. N’e mundial 1966, t’asina nan a elimina e gran futbolista Pele, nan a manca su pia nan intencionalmente den e “apex” di su carera, y referee nan di e temponan ey no a hasi nada (futbol tabata diferente tambe). Mi punto ta cu e pianan mester cuido, y tambe tempo pa recupera entre partidonan, p’aso sin pia bo no por hunga bon futbol.
Otro perspectiva ta cu e seleccion U-17 aki ta un ekipo den progreso, ta apenas algun anja atras cu nan a cuminsa gatia, nan a bin ta creciendo for di U-15 liga C (liga mas abou), unda nan a gana titulo casi un paar di anja pasa, kiermeen e team di Aruba awor, ban bisa, ta na nivel Liga B den Concacaf realmente. Jamaica y Honduras ta na nivel liga A caba, nan ta paisnan na nivel di Mexico y USA. Kiermeen cu Aruba ta batayando tecnicamente hopi riba nan mes nivel, apesar cu mester tene na cuenta tambe cu e campeonato regular di Aruba Femenino U-17, nan ta hunga ‘mitar veld’ so y menos cu 90 minuut pa wega, kiermeen cu mayoria di nos muchanan ainda ta hungando masha poco futbol semanalmente, algo pa considera.
Enfin, hasta sin e factornan ey cu mi a menciona, hunga cuater wega den seis dia ta brutal na cualkier nivel, ni e seleccion nan masculino grandi ta hasi esey. E muchanan di e seleccion aki mester sa cu e fanaticada ta aprecia nan gran rendimento y ta sostene nan completamente pa nan por logra mas den nan siguiente wega y torneonan, pero ya nan ta ganador caba den ‘e wega di esfuerzo’, y ohala cu mas fanatico por a yega stadion, ainda tin chens diasabra awor. Conociendo e personalidad di e ekipo aki, mi ta sigur cu nan lo husa e situacion aki como motivacion, pa crece y mehora mas ainda, esey ta nan gran oportunidad cu e experiencia monumental y maratonico aki.
Aruba ta hunga contra Saint Vincent mayan diasabra 31 Jan. anochi 8pm na Stadion GP Trinidad
