Esaki tawata e di tres partido competitivo di Aruba den solamente cuater dia
–
Aruba U-17 vs Guyana U-17 na Stadion Trinidad – Foto cortesia AVB
–
Aruba a topa cu Guyana unda nan a perde e partido aki y pa prome biaha nan a permiti un gol den e prome tempo di wega. Guyana tawatin mas di e bala pa casi henter e wega, pero Aruba cu mas ofensiva den e partido aki compara cu e weganan contra Honduras y Jamaica. Mester nota cu Guyana a bin di un descanso di cuater dia prome cu e partido aki contra nos seleccion.
–
Zyana Rogers (9) di Aruba den accion contra Guyana
–
E prome gol di Guyana a cai na minuut 26 pa medio di Anaya Joseph, asisti pa Alexaudria Chasles. Un gol foi mei mei den box cu Joseph a anota cu su pia drechi depositando e bala cu a na banda robes di e porteria defendi pa Dylana Veenstra, 1-0 pa Guyana.
E “Lady Jags” di Guyana tawatin hopi mas yegada cu Aruba, 18 tiro den e partido pero solamente 5 di peliger, Aruba tawatin 8 tiro riba gol cu 3 tiro di peliger. Asina mes Guyana su di dos gol a yega t’e na minuut 88, casi na final di wega, unda cu Adrianna Chin ta anota foi di den box, e bala ta bai den centro di e gol, un asistencia atrobe di Alexaudria Chasles. 2-0 pa Guyana.
Guyana cu 64% di posesion di bala den e partido, unda nan a domina hopi den aire, ganando 80% di balanan. Esey tambe por ta indicacion duidelijk di nan bentaha den condicion fisico cu e extra dianan di descanso.
E “Rising Briyante Girls” di Aruba un biaha mas a duna tur cu tin cu lok’e nan tawatin, atrobe contra un pais cu ta rank mas halto cu nos.
Nota: siguientemente Aruba lo enfrenta Saint Vincent diasabra awor 31 di januari pa 8pm den Stadion Trinidad.
–
–
Resumen:
⚽’26 Anaya Joseph GUY ⚽’88 Adrianna Chin
🟨’31 Franken ARU 🟨’46 Pasvolsky GUY 🟨’90+2 Rogers ARU
